نائب دايرتنا بيصب في مصلحتنا

أنا مش عارف ليه سيادة النائب بتاع دايرتنا حابب يعيش في دور «المحلل».. أقصد المحلل السياسي يعنى.. البيه تلاقيه كل فترة ناطط لنا في الدايرة وهاااااااتك يا رغى في تبرير تصرفات الحكومة.. مع أن ماحدش طلب منه كدا.. ولا حتى الحكومة نفسها.. لكن هنقول إيه بقى.. دى بقت موضة خلاص وسباق لمن يريد اللحاق بالركب العظيم.
وأنا بقى جمعتكم النهارده يا أهالي دائرتى الكرام علشان أقولكم إن نائبنا لا يقصد بتصرفاته دى أنه يجامل الحكومة أو يتسلق على حسابنا للتقرب للوزراء لا سمح الله.. هو بس فاهم غلط مش اكتر.. نائب دايرتنا فاهم أنه بيصب في مصلحتنا.. هو مصدق إن قرارات الحكومة بتصب في مصلحة المواطن محدود الدخل.. والراجل نائب عن دايرة كل أهلها من محدودى الدخل.. فأراد الرجل أن نثق مثله في الحكومة ونستنى كام سنة كدا لحين تحسن الحالة الاقتصادية للحكومة وللشعب ولأمة لا إله إلا الله محمد رسول الله ومجد سيدك دايما باسم الله.
كل الحكاية أن نائبنا مش عارف طريق مصلحتنا.. وإلا كان زمانه صب فيها بنفسه.. ماهو برضو صاحب حصانة ويستطيع..
والله ناس طيبة قوى يا خال.. وفاكرين نفسهم بيتعاملوا مع شوية عيال.. لكن اللى ممكن أقوله لسيادة النائب، إن وصولك تانى للبرلمان أصبح محالا.. فنحن نريد نائب يمثلنا عند الحكومة وليس العكس يا عم عبعال.
عموما أنتم تستحقون ما يجرى لكم ولمصلحتكم.. فكل هذا بسبب اختياراتكم.. فأنا كنت أمامكم واستكثرتكم عليا مقعد برلمانكم.. وأقول قولى هذا وأستغفر الله لى ولكم.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.