«بحبك موت» قصيدة ل«علي فرج»

أنا العايش على الهامش
ومش برفع في حبك صوت
وإن كنت في يوم صرخت
تكون صرختي صرخة موت
بحبك موت
أنا عاشقك ومش محتاج
عطف منك ولا سلامات
أنا عاشقك واللي بعشقه
ضاع خلاص مني ومات
أنا اللي عمره ما طلب منك
ورغم حاجته مالوش طلبات
بحبك موت
ولو كان طريقك مش واضح
ولو كان فعلك كمان فاضح
سارقة مني أحلامي لبكره
ضاع فيكي مع امبارح
بحبك موت
أنا شايف فيك الويل
وزاد فيكي سواد الليل
وظالمة وحالتي دليل
وشقاكي يهد الحيل
بحبك موت
بدون لازمة فيكي بموت
وأنا مخنوق في الزحمة
كأني في بطن الحوت
ولو كان حبك تمنه أموت
بقى عادي عندي الموت
بحبك موت
مش مهم عندي أعيش
وأنا منك كأني الريش
أنا ابنك وأنا الحرافيش
ودايما بتقوليلي مافيش
بحبك موت
باقي جوايا شوية روح
خنقاني منين ما باروح
بتضحكلك وأنا المدبوح
وسايباني كمان مجروح
بحبك موت
وأنا وحدي ومش خايف
وكمان تايه ومش خايف
وإنتي عارفة وأنا عارف
وكلي ليكي وأنا عارف
وفِي صفك بكون واقف
بحبك موت
وقفت بصوتي بدافعلك
وهتافي كان باسمك
أنا صورتك أنا رسمك
ودمي دليلي إني ابنك
بحبك موت
وكتير بأقول مالوش لازمة
أسكت وأبلع كمان جزمة
حياتي وموتي بلا لازمة
منهوب وخلوني أنا الأزمة
بحبك موت
أنا الشقيان من ويلك
وأنا الحيران من غيرك
ورغم كل سواد ليلك
عاجز أحب يوم غيرك
بحبك موت
أنا المنسي وأنا عايش
وميت فيكي وأنا عايش
بالاسم بس أنا عايش
وبتحاسب وأنا عايش
بحبك موت
أنا اللي كنت معاكي زمان
وكنت هنا قبل وجود إنسان
ولو عدوك زاد غدره وخان
بكون عكازك لبر أمان
بحبك موت
أنا مش مع حد ولا حاجة
ولا ليا شروط ولا حاجة
ولا بهتف عشان حاجة
وفيكي قتلاني الحاجة
بحبك موت
أنا المعدود مع الزحمة
ومش باين من الزحمة
وإن قلت في يوم كلمة
بموت غدر بدون رحمة
بحبك موت.