السلام عليكم أنا طالبة جامعية عندي 19 سنة، مشكلتي بدأت أما جه يتعرف عليّ في الكلية وهو محترم أوي وكنا زمايل أوي، وواحدة واحدة اتعلقت بيه، قال لي بحبك قلت له وأنا كمان، ومر 8 شهور، وكل يوم بحبه أكتر من الأول ومتعلقة بيه أكتر، وهو سابني من غير سبب ومن غير ما يقول لي سابني ليه؟ وأنا منهارة وحاولت أموّت نفسي أنا بقيت أخاف أقعد لوحدي عشان ما اعملش في نفسي حاجة أنا محتاجاه أوي، ومش قادرة أعيش من غيره، كل ما أشوفه ببقى نفسي أجري عليه وأكلمه، قولوا لي أعمل إيه، بالله عليكم أنا بانهار أنا خايفة أعمل حاجة في نفسي أرجوكم ردوا علي. amera
صديقتنا العزيزة, وفي رأيك حتى لو موّتي نفسك ده هيفرق معاه؟ طبعا لأ؛ لأن اللي ما هموش حياتك مش هيهمه موتك, طبعا الحالة اللي أنت فيها صعبة فعلا؛ ومش أي حد يقدر يتحمل صدمة زي دي؛ بس لازم تتحملي, اتحملي علشان ربنا, ربنا اللي بيحبك فنجاك من الشاب ده وبيطهرك من التجربة دي بالعذاب اللي بتمري بيه دلوقتي؛ بس ده علشان يرضى عنك وتتعلمي, فمعلش لازم تتحملي, اتحملي علشان أهلك اللي مش هيقدروا يتحملوا فراقك لو بعيد الشر حصل لك حاجة, اتحملي علشان مش هو ده اللي يستحق منك تعملي كده في نفسك, لازم تفوقي وترجعي أقوى من الأول, ذاكري وانجحي واتخرجي واشتغلي واتجوزي وخلفي, ليه تحرمي نفسك حياة كاملة علشان تجربة واحدة فاشلة؟! صعبة الدموع وبتحرق قلبك؟ ابكي علشان ترتاحي, ولو البكاء بيتعبك قاوميه, بلاش تبقي ضعيفة, بلاش تسيبي نفسك للشيطان يفرض سيطرته عليك, الجئي لربنا يحميك منه, ويبعد وسوسته عنك, اترمي في حضن أمك أو أختك أو والدك أو شخص قريب عزيز عليك, يهمه أمرك, بلاش تحكي لو مش عاوزة أو مش قادرة, بس بلاش تبقي لوحدك, مش علشان ما تعمليش في نفسك حاجة, لأني عارفة إنك أقوي من كده بكتير؛ لكن علشان تحسي إن الدنيا لسه فيها حب, وإن الحب اللي فكرتيه حقيقي كان وهم, وإن الحب الحقيقي, مش مجرد كلام ولا حتى تصرفات ظاهرية, الحب الحقيقي احتواء, وطمأنينة تلاقيها مست قلبك كل ما تقربي من اللي بيحبك بجد. كل ما تفكري فيه افتكري إنه ما يستاهلش, وإنك غلطتي لما اخترت غلط, بس أنت أكبر من غلطك ده, قرري أنك مش هتدي له فرصة يكسرك مرتين, هتعيشي وهتنجحي وهتحبي تاني, وهتنسيه, أكيد هتنسيه, بس لازم تتألمي وتبكي دلوقتي, ودي ضريبة النسيان, فادفعيها, بس خلي قلبك بين أيدين ربنا, خليك في حضن اللي بيحبوك بجد, وبإذن الله الأزمة دي هتعدي, فاوعي تضعفي تاني قدام أي شيطان إنس أو جن, وهنستنى منك رسالة تطمنينا فيها عليك, ففي رعاية الله وحفظه, وربنا يحميك ويهديك للخير.