بالنسبة لأهالي دائرتنا الكرام اللى بيسألونى عن تصرفات النواب ويطالبوننى بتفسيرها.. أنا بقى جمعتكم النهاردة علشان أجاوب على أسألتكم اللى مصدعين دماغى بيها.. لكن أنا مش هجاوب على كل سؤال منفردا.. لأننى أمتلك إجابة جامعة مانعة لكل أسئلتكم اللى هي بتتلخص في سؤال واحد برضه جامع مانع. السؤال هو: ليه النواب بتوعنا مش عارفين يجيبولنا حقوقنا رغم إنهم عارفين كل مشاكلنا وبيوعدونا بحلها أكتر من مرة في اليوم الواحد؟! أما الإجابة اللى هتخليكم ماتسألونيش تانى عن إنجازات النواب وخدماتهم المعطلة فتتلخص في كلمتين.. فاسمعوا وعوا إحنا لو نظرنا نظرة متعمقة فاحصة ماحصة لتصرفات الحكومة مع السادة نواب دائرتنا فسنجدها لا تعيرهم أي اهتمام بالمرة.. فمشوفناش في يوم من الأيام أي نائب من نوابنا يناقش أي طلب في المجلس يخص دائرتنا. هم يناقشون مواضيع عامة ومثيرة لا تمت لنا أو لمشاكلنا بأى صلة من قريب أو بعيد.. ليه بقااااااااااااااااا؟! أولا شوفوا مكاسب الأعضاء من البرلمان هتلاقوها كلها من ميزانية الحكومة.. وبموافقة الحكومة.. إشى زيادة في المرتبات.. وزيادة في قيمة بدل الجلسات.. والعلاج في أفضل المستشفيات.. دا حتى النضارات بتاعة النواب بتتعمل على حساب الحكومة.. وإشى بدل شياكة وفنادق ومواصلات.. دا حتى المصايف هتلاقيها مليانة حاليا بالنواب وأسرهم على نفقة الحكومة طبعا حد هيقولى انت بتبالغ ياعم البااارلمنجى علشان كان نفسك تنجح وتبقى مكانهم. لكن أنا هقولك وحياة قلبى وأفراحه كل كلامى دا حقيقة مش خيال.. دا آخر فلوس أخدها نوابنا من الحكومة كانت عبارة عن بدلات مصايف حصلوا عليها قبل إجازة البرلمان وطيران على البلاجات والشواطئ الخاصة بدلا من أن يقضوا إجازاتهم بيننا ليشاركونا حر شهر أغسطس. طب بالله عليكم.. لما يكون السيد نائب دايرتنا بيرتع في المصيف على حساب الحكومة.. يبقى إزاى هيعارضها؟! جاوبوا أنتم بقا وبلاش تصدعونى تانى! مع تحياتى: أخوكم "نزيه صندوق عبد المتعال الناخب" الشهير بالبااارلمنجى.. نائب ساقط ببرلمان 2016.