أطرف مواقف رواد «فيس بوك» مع «الكراش» في الصغر.. إسلام: اتضربت بدالها من المدرس.. عماد: دلقت عليها ماية عشان أنقذها.. أحمد: ضربتها كوع كسرت سنانها.. وإسماعيل: إدتها رشوة قلم ألوان

اشتهرت كلمة «كراش» بين الأجيال الحديثة، وهو المسمى الجديد للمعجب أي عندما يعجب أحدهم بفتاة أو العكس يطلق عليها اسم الكراش، ومع ذلك الانتشار للكلمة، روى رواد موقع التواصل الاجتماعي فيس بوك عبر صفحة «الكومنت الفصيل» أطرف المواقف مع «الكراش» في الصغر.
- اتضربت بدالها من المدرس
قال إسلام: «أنا الكراش بتاعتي في ابتدائي كانت هتضرب بسبب إنها نسيت كراسة الواجب بتاعتها، وهي كان عندها حساسية في إيديها لما كانت بتضرب وكده، فأنا قومت قولت للأستاذ إنها عندها حساسية قالي ما لكش دعوة قولتله خلاص أنا هتضرب بدالها هو كان هيضربها عصاية واحدة الله يسامحه مسكني راح رزعني 5 عصيان عنب، وبقينا قريبين أنا وهي في الابتدائي».
- دلقت عليها ماية عشان أنقذها
وأضاف عماد: «أنا الكراش بتاعي وأنا صغير عملت حمام على نفسها والعيال ضحكت عليها ولسه هيقولوا للأبلة عشان تضربها روحت جايب الزمزمية بتاعت المية، وكبتها عليها وعلى هدومها قدام الأبلة عشان متعرفش إنها عملت بيبي بقى وروحت ضاحكلها وتقريبا كانت آخر ضحكة قبل ما الأبلة تضربني، الأبلة بتقولي عملت ليه كده قولتلها كده وكبيت عليها من شوية كمان، العيال قعدوا يلعبوا مع البنت قالولها متعيطيش إحنا كنا فاكرين إنك عملتي حمام على نفسك وصالحوها، كنت شهم وأنا صغير معرفش ليه، أه ملحوظة باستني آخر اليوم وإحنا مروحين من خدي وجابتلي كيس كاجو».
- إدتني بلوك من بتاع زمان
وقال أبانوب: «كنا في المدرسة وقاعدة في الديسك اللي قدامي بنده عليها وأقولها عنيكي حلوة أوي قالتلي نعم!! وقايمة تقول للأستاذ قولتلها خلاص عايز أستيكة، ومن كتر الكسفة اللي كنت فيها قومت أكلت الأستيكة بس كانت من اللي طعمها فراولة وحلوة دي وده تقريبا كان البلوك ساعتها».
- إدتها رشوة قلم ألوان
وأضاف إسماعيل: «كنت مرة مزوغ من الحصة قابلت بالصدفة الكراش، اللي بكل رقة قالت هقول للميس إنك سايب الحصة وعمال تلف، مشيت، وعملت زي الأفلام قلتلها استني موسيقى درامية واديتها قلم من أبو أربعة ألوان في بعض ونظرة رومانسية بحتة، ومن بعدها مش بتكتب اسمي لما بتكلم في حصة لما بتقف في الفصل وكنت بنتخبها عشان تبقى أمين الفصل في حصة الرسم أديها الألون وأنا اللي اتضرب عشان معنديش ألوان وهي تقولي معلش منك لله يا شيخة».
- الجوابات جابتله الضرب
وقالت ياسمين: «هههههههه كراش الابتدائي كان بياخد مني القلم بتاعي يكتبلي بيه جوابات حب وأورهم لماما توريهم للمس وينضرب، الله يمسيه بالخير آخر ما زهق مشى ورايا يقولي ياسمين ردي عليا أنا بحبك، وأنا أطلع أجري أقسم بالله كانت أيام حلوة».
- ضربتها كوع كسرت سنانها
وأضاف أحمد: «لا الكراش بتاعي كانت بترسملي في الابتدائي ولسه فاكر رسمها، مرة إدتها كوع طبقتلها طقم سنانها وفضلت تجيب دم ساعة وأنا ولا في دماغي، وكانت بنت أخت الناظر، بس الناظر كان بيحبني وقالي متكررهاش تاني يا حمادة».