بالصور.. أطرف أسئلة «زواج الصالون».. جنة: «قاللي بتعرفي ترقصي؟».. محمد: «إنت بكرش؟».. سلمى: «أبوكي هيمسكني شغلة إمتى».. آية: «مش ناوية تخسي».. أميرة: «ممكن أشوف مشيتك».. ومنار: أمه خطبتني وأنا حامل

تستطيع مقابلة واحدة، مما يعرف ب«زواج الصالونات»، أن تقنع الفتيات بأنها فكرة فاشلة للارتباط، بالرغم من أنها الأصل في الارتباط الصحيح، ويرجع ذلك إلى عدم حكمة بعض المتقدمين للزواج وتعاملهم مع الفتاة على أنها شيء للبيع.
أجاب مستخدمو موقع التواصل الاجتماعى "فيس بوك" على سؤال إحدى الصفحات عن أغرب أسئلة زواج الصالونات من الشباب إلى الفتيات.
أمه خطبتني وأنا حامل
قالت منار: "جاتلي واحدة وأنا في الوحدة الصحية وكنت مخلفة وحامل في ابني التاني، بتقولي ابني ظابط جيش وأنا جايالك من مكان بعيد وبنتي شافتك امبارح وعجبتيها، وعايزين نخطبك بصتلها ورجعت بصيت على بطني، هي الناس دي اتعمت، قولتلها معلش يا حاجة والله أنا متجوزة قامت تقولي والله ده كويس ومحترم، قولتلها والله متجوزة ومخلفة وحامل كمان، تقولي مرتبه مش عارف كام، قولتلها إيه ياستي ارمي العيال لجوزي ولا أعمل إيه طب أوريكي القسيمة عشان تقتنعي، في الآخر وهي ماشية تقولي يعني مفيش نصيب؟".
مش ناوية تخسي
وأضافت آية: "قاللي: مش ناوية تخسي؟ قولتله مش هخس ولا بفكر أخس ولا عايزة أخس، ومرزوعة معاك غصب عني وإنت مرفوض أصلا من قبل ما أشوفك، الواد وشه جاب ألوان".
بتعرفي ترقصي
قالت ريم: "هو مش أغبى سؤال هو أغبى حاجة سمعتها من عريس عنده 35 سنة ولسه من غير جواز، رغم أنه كان طيب وقادر ماديا، قاللي هو أنا كنت باحوش طول السنين اللى فاتت عشان واحدة تيجي تاخدهم على الجاهز".
وأضافت جنة: "واحد قاللي: بتعرفي ترقصي؟ قلتله: أكيد ده أنا برقص في كل أفراح عيلتنا وجيرانا وأصحابي، راح بابا سمعه قاله يا بني أنا ماضمنلكش موضوع الرقص ده، بس بنتي بترقص ولا أندرتيكر".
سموا قناة السويس بالاسم ده ليه
وقالت مريم: "قاللي إنتي تعرفي ليه سموا قناة السويس كده؟ قلتله عشان السفن بتعدي فيها بسويس بسويس، ماما إديتني بالكوع معرفشي ليه، يلا كان سخيف".
باباكي هيمسكني شغلة إمتى
وأضافت مستخدمة أخرى: "كنت لابسة خاتم فضة راح بص عليه، وقالي إيه ده إنتي مخطوبة قولتله لا متجوزة وقلت أجدد".
وقالت سلمى: "قاللي باباكي ممكن يمسكني شغلة إمتى، وده اللي كان ما شاء الله يقال عليه فاضح نفسه وأهبل".
وأضافت ولاء: "كان جاي عن طريق واحدة، بص وقاللي إيه ده انتى عينك مخضرا أنا قالولي زرقا أنا آسف لازم أمشي، فضلت متنحة والله لحد ماقام، ومشي وندمت إني مردتش عليه رجالة عرة".
ممكن أشوف مشيتك
وقالت أميرة: "قاللي ممكن تقومي تجبيلي ميه عشان أشوفك وإنتي ماشية، وواحد تاني قاللي بتعرفي تكوي الهدوم".
إيه ده إنت بكرش
وأضاف محمد: "واحدة سألتني ممكن تقوم تقف استغربت وابتسمت ووقفت وفجأة عينها برقت وقالت إيه دا إنت عندك كرش".
اشتغلي للساعة اتنين وبمرتب عالي
وقالت شيرين: "قاللي شوفيلك شغل بيخلص الساعة 2 ومرتب عالي، قولتله هشتغل رقاصة حاضر، وهاتي فلوسك على فلوسي عشان أجيب عربية، وهتروحي عند أهلك مرة في الشهر، وأهلي أنا نروحلهم أسبوع وأسبوع وهنبات عندهم كمان، والشارع ده مش هتشوفيه إلا معايا إذا كان المخطوبة مينفعش تخرج تبقى المتجوزة هتخرج، عايزين تاني ولا كفاية".