هدايا "إخوان نويل"

آخر يوم فى سنة 2012 ..يا ساتر دى كانت سنة كبيسة بشكل.. كلها مشاكل ونكد من البيت للزحمة، ومن الزحمة للبيت، وناس ماتت وحاجة تفلق..فأنا قررت أخرج من مود سنة 2012 لسنة جديدة كلها سعادة وقلت: لازم آخد أجازة.
نفّضت للشغل وقفلت موبايلى وقررت استجم..دخلت الحمام وجيت اشغل المية السخنة واعيش بقى فى البانيو.. لقيت المية قاطعة. قلت: لا يمكن أبدا حاجة تنكد عليا، ده آخر يوم فى السنة، وأنا لازم أنتصر وأهزم أحزانى، شغلت مزيكا وقررت اتحزم واديها رقص..لقيت رزع ع الباب، فتحت لقيت تقريبا أبو لهب سكن تحتى وبيقولى: "وطى صوت الموسيقى يا اختى عشان النهاردة الاثنين واحنا صايمين".
لقيت نفسى متنحة، قلت: اتفرج على مسرحية فى التليفزيون..حضرت اللب والسودانى وإزازتين "مياه غازية"، ما تفهمونيش غلط، وشغلت التلفزيون:
"إخوان نويل" يأتيكم بكل ما تتمنونه..اطلب واتمنى إن شاء الله الجنة.
شفت خير اللهم اجعله خير حلم.. "بديع" لابس احمر فى احمر، ودقنه طويلة بس جميلة وبيضا وبياضها شاهق كدة..
وراكب عربية طويلة عريضة جاررها يجى 12 خروف برضه ابيض فى ابيض، وشايل على ظهره بؤجة كبيرة، وشفت اللهم اجعله خير العربية بتطير والهدايا عمالة تمطر تمطر، والناس اتلمت وأعدة تشيل وتعبى ..
وانا أبص ع الناس ألاقى اللى واخدله إزازة "زيت"، واللى واخدله كيس "سكر"، واللى واخدله "مسدسين لعبة".
والراجل اللى لابس احمر فى احمر يطير ويعلا لفوق، وكل ما يعلى الدنيا تمطر هدايا أكتر، وشوية ولقيت الناس أعدة تفتح الهدايا، واتفتحت طاقة فى السما طلع منها شاشة كبيرة "افتكرت إنى أخيرا هاتفرج ع المسرحية"، لقيت راجل كدة عليه الهيبة آعد يطبطب ع الناس ويقولهم: كله بالحب، كله بالحب، لدرجة إنى افتكرت إن النهاردة "الفلانتين" مش الكريسماس.
وفجأة ..أيها المشاهدون، تم إلغاء التهنئة بالعام الجديد، وتم إلغاء الاحتفالات فى التليفزيون، وتم إلغاء الاحتفالات فى الميادين، وتم إلغاء العام الجديد بقرار من عمنا إخوان نويل!!