شلاليت 65

شلاليت
هى الثورة دِى قامت ليه؟
حد يقول لى وأرد عليه
أنا مش فاهم أو مش عارف
حتقول إيه.. وأقول لك إيه
أنا فى النار والفكر إحتار
كل شوية عامل لى حوار
وأنا تايه بين كل مظاهرة
مش عارف آخر المشوار
قول لى بدون لف ودوران
إيه آخرتها مع الإخوان
نفسى فى مرة أعيش فى مسرة
أنا مش ناقص فقر كمان
قمنا بثورة عشان نرتاح
مش علشان نفضل فى جراح
ما تفرقونا بلاش تزيدونا
غُلب وفقر وموت ونواح
شوفوا الناس عايشين إزاى
كله بيصْرُخ ويقول آى
واللى بيسرق واللى بينهب
والمسئول بيقول باى باى
فيه إيه تانى ياعم فريد
كل شوية تعيد وتزيد
كُله بيقرا كلامك لكن
ولا بِيْهمُه وقلبه حديد
فريد طه