مرسى يصرخ بعد الخطاب: الحقنى يا بدييييييييييييييييع!!

كنت ضمن الشخصيات العامة التى تم دعوتها للاستماع لخطاب الرئيس محمد مرسى أمام أعضاء مجلس الشورى المنتخبين والمعينين، وكنت أنتظر بلهفة ما سيلقيه علينا مرسى من مفاجئات جديدة أو أخبار سعيدة، إلا أننى صدمت مثل غيرى بهذا الخطاب الإنشائى الذى أخذ مرسى يقرأه علينا لمدة نصف ساعة، ويؤكد لنا ما كتبه له مكتب الإرشاد فى تلك الأوراق من تحسن فى المعيشة وارتفاع فى معدلات الإنتاج، ويقسم لنا كما هو مكتوب له فى الورقة أن اقتصاد مصر بخير وإننا بعيدون كل البعد عن الإفلاس والحوجة للأجانب وخاصة الأمريكان.
عقب انتهاء مرسى من قراءة ما أملاه عليه مكتب الإرشاد أخذت أضرب كفا بكف وأسرعت للصفوف الأولى كى أطاله قبل الخروج من قاعة البرلمان، وبالفعل سمع ندائى والتفت ناحيتى ورحب بى، فاستأذنته فى كلمتين "على جنب" دخلنا خلف الكواليس وقال لى: ها.. خير يا عم سحلول؟! .. قلت: إنت ليه بتعمل فينا كده يا ريس؟! .. قال: ماذا فعلت لك أو لغيرك يا راجل انت؟!.. قلت: وهذه هى المصيبة يا عم مرسى إنك لاتفعل شىء .. ولو كنا نعرف ذلك ما كنا وقفنا معك فى الانتخابات!! .. قال: هو إيه الحكاية.. ليه كل واحد من أصدقائى اقعد معاه يقول لى هذا الكلام .. يعنى أعمل إيه .. أطلع من هدومى؟! .. قلت: بل اطلع من عباءة المرشد الذى يحركك بالريموت كنترول!! .. قال: طب ما انت عارف يا عم سحلول إن المرشر بيحرك الجماعة كلها بالريموت كنترول .. إيه الغريب فى كده؟! .. قلت: إنت شكلك كده هتجننى وهتجنن الشعب كله .. يا راجل دا انت رئيس مصر .. يعنى رئيسى ورئيس المرشد ورئيس كل من هو على أرض مصر .. ولك أن تحكم وتتحكم فينا جميعا .. المهم صالح مصر!! .. قال: يعنى ممكن أرجع أخطب من غير ورقة، وأهنى أصدقائى سائقى التوك توك والمكوجية والزبالين وكده؟! .. قلت: لا إله إلا الله يا جدع .. اعمل اللى انت عايزه، بس تجيب للشعب حقه: عيش حرية عدالة اجتماعية؛ لأن الناس كرهتك عندما قلت لهم: إن الاقتصاد المصرى بخير، فى حين أن العيال الصغيرة فى الشارع عارفة إننا هنشحت على إيد الإخوان بتوعك يا عم مرسى!! .. قال: طب أنا أعمل إيه يا عم سحلول .. دى الورقة اللى ادوهانى مكتوب فيها كده .. هألف يعنى؟! .. قلت: لا، متألفش ولا تبتكر، فقط افعل ما يمليه عليك ضميرك انت وما يخطر على بالك انت!! .. قال: يعنى ممكن أعمل أى حاجة؟! .. قلت: طبعا!! .. وهنا تشبث برقبتى وأخذ يصرخ: الحقنى يا دكتور بدييييييييع .. الراجل ده بيحرضنى عليك وعلى الإخوان!!