ابنة الفنان صلاح عبد الله: «لا أجد عملا وأرفض وساطة أبي»

اشتكت دنيا صلاح عبد الله، ابنة الممثل صلاح عببد الله، من أنها لا تجد عملا، وبالرغم من كونها خريجة كلية الإعلام منذ 6 سنوات ومن قسم الإذاعة والتليفزيون، لكنها لم تعمل إلا شهرين فقط كمذيعة في قناة الحياة الفضائية.
وأكدت دنيا أن العمل في القنوات لا يتطلب المهنية أو المؤهل، لكنه يتطلب "الحب"، مشيرة إلى أنها لتعمل في مجال الإعلام يطلب منها خدمة من والدها الفنان صلاح عبد الله، ولكن عندما ترفض ذلك يكون الجزاء عدم موافقتهم على عملها. مؤكدة رفضها وساطة والدها.
وقالت دنيا صلاح عبد الله في تدوينة على "فيس بوك": "عندي 27 سنة.. متخرجة من كلية الإعلام قسم إذاعة وتليفزيون بتقدير عام جيد جدا.. مشروع تخرجي فيلم دوكيو دراما مدته 25 دقيقة أخرجته وكتبته وشاركت في مونتاچ والتصوير وتعبت جدا فيه".
وقالت: "اشتغلت صحفية أو محررة بغض النظر عن المسمى، في اكتر من مجلة من وأنا في ثالثة جامعة ومن ساعتها وطول الوقت وأنا بشتغل وبسعى وبحاول.. بس أنا مش صحفية.. أنا خريجة إذاعة وتليفزيون، درستها علشان طول عمري بحلم أبقى مذيعة.. أنا متخرجة بقالي 6 سنين.. بحارب علشان اشتغل.. كما لو اني بشحت.. غلبت وأحبطت.. مبقتش عارفه إيه هي السكه اللي المفروض أمشي فيها علشان اشتغل في الإعلام؟؟!!.. اللي هو مجال دراستي".
وأضافت: "بروح أعمل تيستات في قنوات كتير.. بتصدم إن كله ماشي بالحب كدا زي ما بيقولوا وبالعلاقات.. مش بالشطارة ولا المهنية ولا المؤهل طبعًا.. أصلًا يعني إيه نحو 80% من العاملين في مجال الإعلام مش من خريجي كلية إعلام؟؟!!!! مع احترامي لكل أساتذتي الإعلاميين.. بس دا ظلم شديد".
وعلقت: "أنا بقالي 6 سنين متخرجة وباخد كورسات علشان أنمي موهبتي.. اشتغلت في ال6 سنين شهرين في قناة الحياة مراسلة تليفزيونية (الحمد لله عملت شغل كويس جدا وفخورة بيه) وبعد كدا البرنامج اللي كنت بشتغل فيه أتوقف وطبعا كنت بشتغل من غير عقد فقعدت في البيت وبس بقيت الست سنين في رحلة البحث عن فرصه.. اللي معرفش هتيجي إمتى وأزاي وزهقت من الجملة الشهيرة اللي بسمعها في كل مكان بقدم فيه على شغل "دا انتي باباكي بتليفون يشغلك" أنا آسفة بجد دا خيال مريض.. محدش في الزمن دا بيخدم حد بدون مقابل".
وتابعت: "أنا بتعرض لمفاوضات بجد، أروح علشان اشتغل أسمع الجمله اللي وداني حفظتها وزهقت منها "انتي شاطرة جدًا.. انتي أزاي مبتشتغليش.. لالا إن شاء الله هنعمل حاجة كويسة مع بعض" افرح أنا كلام جميل.. الجملة اللي بعدها على طول "عايزين منك طلب.. افندم.. ممكن تكلميلنا بابا.............." ولو مكلمتش بابا في اللي بيتطلب مني.. ميردوش عليا ويختفوا ويتهربوا".
وقالت: "على النقيض حد يقولي ممكن نكتب اسمك دنيا عبد الله بدل دنيا صلاح عبد الله علشان محدش يفتكر إنك معتمدة على باباكي.. طبعا برفض، مش علشان معتمدة على بابايا،لا دا علشان دا اسمي وفخر ليا".
وأضافت: "أيوة أنا اسمي دنيا صلاح عبد الله بنت الفنان صلاح عبدالله وليا الشرف وفخورة جدًا جدًا بأبوية ووجوده في حياتي نعمة من نعم ربنا عليا وحب الناس ليه بيسعد قلبي.. بس أنا مش صلاح عبد الله يا ناس، أنا إنسانة عايزة يبقي ليا كيان وقيمه في الحياة ومش المفروض ولا من الطبيعي أجبر أبويه على أي حاجة يعملها مقابل إني أخد فرصه واشتغل وأصلًا دا حقي".
وتابعت: "كمان لما فكروا يعملوا نقابة للإعلاميين بيتكلموا في الشروط عن كل الناس إلا خريجي الإعلام.. وإن لازم اللي يلتحق بالنقابه يكون أشتغل في مجال الإعلام معرفش كام سنه خبرة..طب إزاي؟؟! هو في حد أتاح لي فرصة اشتغل أصلا !!!علشان يبقي عندي سنين خبرة وممارسة؟؟!!! ايه الظلم دا؟؟؟!!!! أنا من حقي يكون ليا نقابة.. من حقي التحق بيها".