نوارة نجم: الجيش يحكم من خلف ستار "مرسى"

قالت الناشطة السياسية، نوارة نجم، فى تغريدة لها عبر "تويتر"، اليوم الإثنين "عشان نبقى واضحين وما يبقاش حد عايش على غماه، ارجعوا لوثائق ويكيليكس من أول سنة 2005 عشان تعرفوا إن الإخوان جايين باتفاق بين المجلس وأمريكا، وإن حل مجلس الشعب كان برضه باتفاق بين المجلس والإخوان وأمريكا عشان يدوهم الرئاسة، واوعوا تفتكروا إن السيسى اللى جابه مرسى، أبدا.. السيسى ده اقتراح طنطاوى".
وتابعت، "وأنا بيصعب عليا قوى الناس اللى بتقول الجيش ينزل ويخلصنا من الإخوان.. الجيش لو نزل حيخلص الإخوان منا ويكنسنا عشان يحافظ على الشرعية، واللى يهم الإخوان دلوقت إنهم يزودوا مواردهم ويرفعوا الدعم ويتخذوا شوية إجراءات اقتصادية حتطلع عينا عشان ياخدوا القرض.. القرض ده مش فلوس، ده إثبات ولاء لأمريكا عشان تثبت حكم الإخوان".
وأوضحت "موضوع إن العسكر اتقمص عشان قلنا يسقط حكم العسكر فقال لنا اشربوا الإخوان.. عيب عليكوا تصدقوا الكلام ده.. هى خناقة واحد ومراته؟ دى دولة.. طنطاوى قدم السيسى للأمريكان بوصفه وزير الدفاع اللى بعده.. مساكين اللى بيعملوا توكيلات للسيسى.. اعملوا توكيلات لأمريكا.. عشان هى اللى جابت الإخوان".
وأضافت، "اللى أنا مش عارفاه بقى، إزاى نخلص أصلا من أمريكا وكبستها على نفس اللى جابونا؟ دى ناقص تختار لكل واحد يتجوز مين.. إنتوا فاهمين غلط خالص، إحنا مش بنمد إيدنا لأمريكا عشان إحنا محتاجينها، أمريكا هى اللى محتاجة تقرضنا، وبتختار السلطة اللى توافق على القروض".
وأضافت "غلابة إنتوا، إحنا لسه تحت الحكم العسكرى، وحنفضل تحت الحكم العسكرى، المؤسسة العسكرية بتتحكم فى كل حاجة ومصدره الإخوان، وأمريكا متمسكة بالإخوان لأن الإخوان مدينهم كل الضمانات اللى هم عايزينها، وعشان هى بتخطط للمنطقة كلها مش لمصر بس".