أبو قردان: لا أرض ولا حتى دود..الله يخرب بيوتكم!

يادى الواقعة السودا.. البلد فى حالة فوضى أمنية والدنيا خربانة ومخلصناش من الوقفات الاحتجاجية والفئوية والرافضين لحكم «سي مرسى» من البنى أدمين، إلا وأسراب كبيرة من عائلات أبو قردان تسد عين الشمس أحاطوا بقصر الاتحادية
فى مظاهرة رهيبة.. اعتقدنا فى بادئ الأمر أنها طير أبابيل ونظراً لتواجدى كمحقق لجريدة «فيتو» وسط المتظاهرين وبعد أن اتخذت ساتراً من هول الموقف، وأنا أدعو الله ألا أكون من بين الهالكين، وبعد تكشف الموقف اتضح أنها مظاهرة عظيمة لأبو قردان أحاطت بقصر الاتحادية وأخذت تهتف بأعلى صوتها
(دود.. حرية.. بيئة نقية)
وكان يتقدمهم كبيرهم، فتقدمت منه لإجراء حوار معه والاطلاع على أسباب تلك المظاهرة.
وسألته:
أبو قردان يا صديقى.. ما أسباب تلك المظاهرة العظيمة التى تقومون بها؟
أجاب فى اشمئزاز: هو أنتو يابنى آدمين تعملوا البلاوى دى كلها وفى الآخر
تعملوا رحكم مش واخدين بالكوا.
قلت له: واحدة واحدة يا صديقى..
طول عمرك صديق للفلاح فلماذا تركتم الغيطان والبساتين
وجئتم للتظاهر أمام قصر الرئاسة؟
أجاب: صحيح كان جدنا الكبير صديقا للفلاح.. ده أيام ما كان فيه فلاح بجد.. الأرض شربت من عرقه ودمه.
تقصد إيه يا أبو قردان ؟!
أقصد أقول أيام ما كان عندكوا بورصة للقطن المصرى اللى مافيش زيه فى العالم ده كله، اللى كنتوا زمان بتقولوا عليه الذهب الأبيض، وقبل الفلاح ما يهجر أرضه ويبعت ولاده يتعلموا في أوربا، وأيام ما كانت الست الفلاحة تصحى الفجرية تعجن وتخبز كان وقتها جدى الكبير صديقا للفلاح ومن سنين الحال اتقلب والفلاحة دلوقتى بقت تتمشى على الجسر وفى أديها الموبايل وتسمعها وهى واقفة فى طابور العيش بتتكلم مع جوزها فى الموبايل وتقول له: اطبخلك إيه النهاردة يا أبو إسماعيل؟ والمصيبة اللى أكبر من كده أنهم بنوا على الأرض الخضرا مبانى خرسانية ومش بس كده دا حتى كمان السماد اتغير بعد ما كان سماد طبيعى بقى كيماوى مسرطن يعنى من الآخر الفلاحين سرطنوا الأرض والزرع وأنت عارف إن حياتنا كانت على الآفات الزراعية.. دود الأرض يعنى وده أصابنا بالأمراض الخبيثة زى البنى آدمين يعنى من الآخر لا بقى فيه فلاح ولا أرض تنزرع يعنى من حقنا نقوم بمظاهرة قردانية للمطالبة بحقوقنا
الله الله يا أبو قردان وايه بقى حقوقكم هما كانوا البنى آدمين خدوا حقوقهم لما أنتوا تيجوا وتطالبوا بحقوقكم!
رد أبو قردان: أيوه احنا لينا حقوق.. أنت تعرف أن نصنا مريض بالفشل الكلوى
بسبب السماد المسرطن واحنا جايين نطالب رئيس الجمهورية إن من حقنا العلاج على نفقة الدولة والطب البيطرى زى ما أنت عارف محتاس فى شوية أنفلونزا الطيور، ومات منهم الملايين.. هنستنى إيه بقى لما نموت إحنا كمان.
يعنى تقصد إيه يا أبو قردان؟
أقصد ان الرئيس مرسى يصدر قرارا بضم الطب البيطرى لرئاسة الجمهورية علشان نضمن عدم التلاعب بالقرارات الطبية يعنى من الآخر اللى معاه يتعالج واللى ممعهوش يموت. يا نهار أسود يا أبو قردان هو أنت فاكر إن جريدة فيتو تقدر تكتب الكلام ده للرئيس مرسى ونطالبه بضم الطب البيطرى للرئاسة شكلك كده عايز تقفل لينا الجريدة لو الريس فهمنا غلط؟!
رد أبو قردان: الريس يفهم غلط ليه هو فيه رئيس بيحكم مصر ويفهم غلط!!