«برغم اللقا» قصيدة للشاعر فتحي نجيب

برغم أن اللقا موجود
بحس بحاجة نقصاني
يجوز نفسي ف حاجات منك
أحس إنك
لدرجة عشقي.. عشقاني
يجوز ضمة ترد الروح
أحسك بيها ملكاني
وجايز نظرة من عينك
أحسك بيها حضناني
وم الممكن
تكون بوسة على خدي
فاحسّ برعشة هزاني
وم الجايز
تكون بوسة على الشفة
ما أنا مجنون وعرفاني
وطبع ف عشقي.. أنا أناني
وجايز طبطبة على الإيد
أحس إن إنتي فاهماني
وم الممكن تكون كلمة
تقوليها
بهمسة بسيطة ف وداني
تحلي زماني ومكاني
فاحس بفرحة وبنشوة
وألف بلاد وأتوه وأرجع
لحضنك
ما إنتي عنواني
وأطلب كل ده تاني
من الآخر أنا طماع
وعايزك تبقي ليا حياة
بتجري جوه شرياني
وهرجع أقولها من تاني
برغم أن اللقا موجود
بحس إن إنتي نقصاني