ضُمني

زيزو كلابيظو مخاطبا ابن عمه تمّور الفرفور الذي كانت أنامله تداعب لوحة مفاتيح حاسوبه الجديد: يووووه انت لسه قاعد ع البتاع ده بتعاكس في بنات الناس؟!! يا جدع حرام عليك... أنت ما بتخافش من ربنا وحسابه يوم الموقف العظيم!! والله أنا خايف الأفعال السودة اللى أنت بتعملها دى تطلع كلها على دماغك مرة واحدة، وساعتها هاتقول يا ريت اللى جرى ما كان...
تمّور الفرفور مستنكرا: ما كان مين، والناس نايمين ؟!! يا زيزو يا حبيبى هو في الدنيا كلها أحلى من البنات والستات ورقتهم وطعامتهم غيرش أنت بس اللى محبكها حبتين.. شوف بقى ابن عمك مشيبهم.. مشيبهم.. وحياتك عندى أنا مزبطهم بكلامى ودحلبتى وهمّ يا عينى يا مساكين.. بيدوبوا في دباديبى وقاعدين "ويتنج " من صباحية ربنا وأنا ولا معبرهم، بس بينى وبينك أنا ابتديت أزهق منهم كلهم ومركز مع واحدة بس.. أما حاجة إيه.. "سو كيوت" وأبوها مقاول صعيدى كبير ومن أصحاب الملايين وشكلها هي اللى هايكون عليها العين والنية، بس للأسف في واحدة من حبايبى القدام بعد ما بعتها وإديتها السكة؛ عرفت "أكونت" حبيبتى الجديدة وبعتت لها عليه كل غراميتنا وصورنا لما كنا مع بعضنا، وحذرتها منى جامد يعنى من الآخر ضربتنى إسفين متين عندها، بس على مين وحياتك الكلام ده كله ما ياكلش معايا، قعدت يومين سهران لحد ما ألفت لها قصيدة جامدة تحنن قلبها عليّ، قلت لها فيها:
ضمني....
نفسى حد يضمنى حد نبضه يحسنى
حد روحه تعزنى حد قلبه يحبني
شفت في هواك أجمل هوا
من نور بهاك قلبى ارتوى
بس الغرام ضاع في الهوى
لما بقساوتك سيبتني
ضمني....
نفسى حد يضمنى حد نبضه يحسنى
حد روحه تعزنى حد قلبه يحبني
إنت الحياة بعدك عدم
قلبى في هواك قلبى انظلم
شوف النصيب شوف القِسَمْ
بعد الفراق..... بتودِّني
ضمني....
نفسى حد يضمنى حد نبضه يحسنى
حد روحه تعزنى حد قلبه يحبني
عشت الحياة غربة وسفر
يا ما قاسيت ظلم البشر
افرد دراعك يا قمر
جوه حضنك حطني
ضمني....
نفسى حد يضمنى حد نبضه يحسنى
حد روحه تعزنى حد قلبه يحبني
بعد الغياب افتح لى باب
أنا شعرى شاب أنا قلبى تاب
طول الفراق كتر العذاب
من يوم م سيبتك هدّني
ضمني....
نفسى حد يضمنى حد نبضه يحسنى
حد روحه تعزنى حد قلبه يحبني
وبعتها لها، وحياتك انت عندي؛ المسكينة ما خدتش في أيدى غلوة، ولقيتها باعتة لى قلب ودباديب ع الماسنجر واديتنى ميعاد بكرة في شقتها ومستنيانى على أحر من الجمر.
يذهب تمّور الفرفور حسب الميعاد الذي أعطته له حبيبته ليفاجأ بأبيها المقاول الصعيدى وإخوتها وقد ربطوه إلى كرسى الصالون وهاتك يا ضرب وفين يوجعك والمعلم أبوها يصيح بأعلى صوته قائلا: ضموه قوى ياواد انت هو وخلوه يحس جامد..أديك لقيت اللى يضمك ويربيك كويس ياولد الفرطوس...