"أنا أصلا مزة جامدة".. هابي فالنتين بيبي

- الشاب الكيوت: لازم يابيبى نتقابل بكرة بليز...
= المزة: اشمعنى بكرة؟؟
-الكيوت: بكرة عيد الحب هابى فالنتين بيبى أنا جبت لك دبدوبة حمرا وقلب أحمر قطيفة
= المزة: هابي فالنتين بيبي بس أنا بكرة عندى مدرسة وهاطلع على درس الفرنساوى ومنه على درس الكيمياء..
- الكيوت: كيميا إيه وفرنساوى إيه يابيبى اللى بتقولى عليه ما أنا عندى بكرة حصص كتير في المدرسة وهازوغ عشان أقابلك في الجنينة اللى قدام محطة المترو.
=المزة: أوك بيبي هازوغ عشان خاطرك.. بس أنا ما أعرفش شكلك ابعت لى صورتك..
((الكيوت بعد مايبعت لها صورته وهو ضارب الجيل على شعره اللى واقف لفوق ومتصور مع الجيتار)) الكيوت: بس أنا بكرة هابقى نيو لوك هالبس قميص أحمر وهاجيب شعرى على جنب وهاستناكى على باب الجنينة أوك؟؟
= المزة الجامدة طحن: أوك يابيبى هابى فالانتاين.. ممكن طلب أخير؟؟
- الكيوت: شور يابيبي انتى تؤمري..
= المزة: ابعت لى كارت شحن زيرو حداشر بعشين جنيه..
(الكيوت يبعت الكارت فورا )
-الكيوت: وصل يابيبي؟؟
=المزة: وصل ياقمر تسلم لى يا بيبى بكرة على معادنا بقى باي...
(الشاب الكيوت يروح حسب المعاد ضارب الجيل وشعره على جنب والقميص الأحمر أبو لياقات واقفة على باب الجنينة في ايده شنطة فيها الدبدبوبة وشنطة تانية فيها القلب الكبير يعدى عليه واحد صاحبه من زمان... صاحبه يضحك على منظر الكيوت)
-صاحبه: ريح نفسك المزة مش هتيجى.. نيهاهاهاها
-الكيوت: مزة مين؟؟
-صاحبه: المزة الجامدة جدا
-الكيوت: ؟؟؟؟؟؟؟؟
-صاحبه: نيهاهاهاها.. يا ابن العبيطة أنا صاحب الصفحة شكرا عالرصيد وهابى فلانتاين بيبى