سقفة للقرد (2) أى مبلغ يسد حتى لو لبسونى قرد

ارتدى أفضل ما عنده وتوجه إلى حديقة الحيوان وهو في قمة الحماس.. اتجه إلى عامل التذاكر وسأله
هو : مكتب المدير فين حضرتك..أنا عايزه بخصوص..
انتفض الرجل في مقعده وهب واقفا قبل أن يكمل جملته، وأصر على أن يوصله للمدير بنفسه. فمشى معه متعجبا حتى وصلا إلى مكتب المدير. ورأى الرجل يميل برأسه على الساعي ويقول بصوت منخفض..
عامل التذاكر : بَلَّغ المدير إن الباشا المفتش وصل
ازدادت دهشته لكنه آثر الصمت حتى يقابل المدير الذى استقبله بحفاوة بالغة
المدير :شرفتنا يا افندم.. المكتب نور
هو : المكتب منور بأصحابه
المدير : يبقى زاد النور بحضرتك.. تحب تشرب إيه سيادتك؟
هو :مفيش داعي
المدير : ودي تيجي.. لازم تشرب حاجة
هو : أمري لله.. شاى
المدير : شاى إيه بس.. وده مقام حضرتك؟
هو : ياسيدي أنا عايز أشرب شاى
المدير : (يضغط الديكتافون) شاى سكر برة يا حسن
هو : أنا كنت جاي عشان..
المدير :(مقاطعا) أنا عارف كل حاجة.. ثواني تشرب الشاى ونقوم نلف على الجنينة كلها سوا
هو : وأنا مالي ومال الجنينة كلها.. أنا جاى للقرد
المدير : (مرتبكا) أيوه ماهو أصل
هو : أصل إيه؟ هو فيه إيه؟
المدير : لا مفيش حاجه.. بس هو الموضوع يعني
هو : إيه يا افندم.. أنا مش فاهم حاجة.. الوظيفة لسه فاضية ولا لأ؟
المدير : وظيفة إيه؟
هو : الوظيفه بتاعة حارس القرد
المدير : (وقد تبدلت لهجته) لا هو إنت جاى عشان الوظيفة؟
هو : أيوه.. أمال حضرتك كنت فاكر إيه؟
المدير : (منفعلا) فاكر إيه.. نهارك زي وشك.. (يتحدث في الديكتافون) سُك على الشاى يا حسن
هو :(وقد أحس بالغدر) الله الله الله ليه كده يا افندم
المدير : بقى مِنشّف دمي من الصبح.. وعمال أقول لك حضرتك وسيادتك.. وفي الآخر تطلع عايز وظيفة؟
هو : وهو عيب يا افندم.. (ينفعل في الحديث) وبعدين حضرتك بتكلمني كده ليه.. فيه شغل أشتغل.. مفيش أمشي من غير قلة ذوق
المدير : أنا قليل الذوق
هو : (متراجعا) آسف يا افندم.. بس حضرتك غيرت معاملتك فجأة وقعدت تزعق.. فخرجت عن شعوري
المدير : لا شعورك ولا شعوري.. الوظيفة خلاص بح
هو : طب مفيش شغل تاني؟
المدير : لأ
هو : أى حاجة.. ساعي حتى
المدير : يحنن.. غور بقى
هو : طيب
يقوم من على كرسيه محبطا، فيتعثر وتقع منه أوراقه، وعندما يبدأ في لملمتها، يتحدث المدير في المحمول، ويبدو عليه الانزعاج الشديد..
المدير : أيوه يا دكتور إيه الأخبار؟.. يعنى ايه؟ كده المدة طالت والعلاج ما جابش نتيجة.. حاول يا دكتور.. لازم تنقذوا حياتها.. دي غالية عندي قوي.. أنا مستعد أدفع اللي إنت عايزه بس تعيش.. ربنا معانا جميعا مع السلامة
هو : ألف سلامة على بنت حضرتك
المدير : بنتى مين؟ هو انت لسه ما مشيتش
هو : ماشي أهو ( لنفسه) راجل غتت
يستوقفه المدير فجأة
المدير : استنى عندك
هو : اللهم طولك يا روح (لنفسه) على هذا اللوح
المدير : إنت عايز تشتغل؟
هو : مش حضرتك قلت مفيش شغل؟
المدير : لأ فيه بس أقعد ارتاح
هو : (فى سره) عليا النعمة الراجل ده مجنون
يقوم المدير ويدور حوله
هو : فيه حاجه يا أستاذ
المدير : بصراحة يا ابنى أنا ماعنديش غير وظيفة واحدة
هو : عارف.. حارس قفص القرد
المدير : هىّ شغلانة شبهها.. بس غريبة شوية
هو : (ساخرا) هَشتغل قفص يعنى؟
المدير : لأ.. قرد
هو : (ثائرا) عليا النعمه إنت راجل ضارب.. قرد.. قرد يا راجل ياخروف
المدير : اهدى بس
هو : أهدى إيه بس.. (يخرج) اجري يا عم
المدير : استنى بس
هو : أستنى أيه.. أستنى لما تسلسلني وتسرح بيا في الموالد
المدير : اسمعني بس الأول
هو : غرد يا بلبل
المدير : إحنا عندنا هنا غوريلا نادرة جدا
هو : ودي هَتجوزوها لي بقى إن شاء الله
المدير : ما تهمد بقى وتسمع.. الغوريلا دي كانت أهم مصدر بيدر دخل للجنينة.. عشان نوع نادر جدا
هو : لخص
المدير : الغوريلا دي يا سيدي جالها مرض صعب
هو : ربنا يشفيها ويشفيك.. كمل
المدير : بعتناها تتعالج.. بس يظهر مفيش فايدة.. الدكتور لسه مكلمني قدامك.. وقال إن الحالة بتتأخر.. لو حد عرف هاروح في ستين داهية.. انا هادي لك المبلغ اللي تطلبه
هو : أى مبلغ؟
المدير : أى مبلغ
هو : 700جنيه في الشهر
المدير : مش كتير؟
هو : خلاص أروّح
المدير : طيب طيب موافق
هو : 750 والا أقولك.. 800 جنيه
المدير : ماشي.. بس مَفيش مليم زيادة
هو : فاهم فاهم.. همّ 900 جنيه بس
المدير (كاظما غيظه) بص يا سيدي.. حضرتك هتلبس البدلة دي ( يريه بدلة كاملة لقرد كبير من نوع الغوريلا) وهتقعد في القفص.. وأنا هقول إنك قرد جديد لسه واصل
هو : طب ولما الليل يهِل يا فكيك؟
المدير : عادي.. إنت هَتيجي الساعة 6 الصبح تلبس البدلة وتدخل القفص.. وبعد ما الجنينة تقفل.. آجي أنا وأخرّجَك.. وتروح يا عم
هو : اتفقنا.. بس أقبض مقدم.. إيدك على 1000 جنيه
المدير يلقيه بكرسي المكتب...
ترى كيف سيتعامل بطلنا مع وظيفته الجديدة؟
وهل سيستمر فيها إلى الأبد؟
انتظروا أحداثا أقوى ومضحكة مع الجزء الثالث من...
سقفة للقرد