بالصور.. رواد «فيس بوك» يروون مواقفهم المرعبة.. فارس: «حصلي مقلب في المقابر».. شاهندة: «عفريت بيخبط عالحمام».. سامية: «بمشي وأنا نايمة».. ومنار: «العروسة اتحركت في الضلمة»

يدعى البعض أن قلوبهم ماتت وأنهم لا يخشون تلك الخزعبلات والوساوس التي تصيب البعض الآخر بالرعب، ولا يبالون بأقوى أفلام الرعب، لكن عندما يتعلق الأمر بالواقع يكون موقف الجميع أن الفرار سيد الموقف، وروى رواد موقع التواصل الاجتماعى "فيس بوك" أقوى المواقف المرعبة التي واجهوها.
- مقلب في المقابر
قال فارس: "أنا إمبارح خرجت أنا وصحبي كانت الساعة 10 بالليل وكنا مشين في حتة مرعبة وكل شوية بنسمع صوت مرعب وكان في حتة قريبة من الشارع اللى ماشين فيها مقابر، ومرة واحدة لقينا حاجة لونها أبيض وبعد كده مشيت ورانا، وفي الآخر مشينا في شارع تاني لقينها وقعت في الأرض، وقالت ساعدني بالله عليك، بعد كده قامت وجرت وسمعنا أصوات ضحك طلعت تاني وتقرب أكتر مني خوفت، وفي الآخر طلع واحد صاحبي وعامل فيّ مقلب هو صاحبي التاني".
- النوم وعمايله
وروت سامية أحد المواقف المرعبة، قائلة: "أنا بقي مكنتش بترعب قد ماكنت برعب، كنت بعمل حاجات غريبة جدا وأنا نايمة، كنت ساكنة في المدينة الجامعية أصحى بالليل والأوضة ضلمة كحل أبرق لأصحابي وأقعد أتكلم وأعمل حاجات غريبة وأنام وأصحى مش فاكرة حاجة، وأوقات أصحى أقولهم أنتو مين أنتو أشرار، أنا نص صحابي قطعوا الخلف".
- اللمبة المسكونة
وتذكر الأكسلانس: "في يوم كونت قاعد في البيت بالليل لوحدى، المهم اللمبة عمالة تشتغل وتطفي لوحدها أنا مش في دماغي حاجة، قمت أهز اللمبة فرقعت في وشي وكل لم أجيب لمبة أحطها في المكان دا تفرقع أقسم بالله بيت ملبوس".
- حلقة الرعب
قال عمر: "كنت قاعد بسمع أحمد يونس حلقة الآلة الكاتبة، وفي النص هو بيقول إن أخوه بيدخل جواه لقيت السرير بيخبط من تحت فببص ملقتش حاجة، فبعديه لقيت السرير بيتهز أكن حد بيخبطوا، طلعت أجرى وأنا بقرأ آية الكرسي".
- عفريت بيخبط عالحمام
وأضافت شاهندة: "أنا لسه حاصلى موقف رعب طازة من أسبوع، قمت الصبح بدري على 6 الصبح أدخل الحمام لقيت حد بيخبط على باب الحمام، وبيقولى انتى جوه فرديت بقول أيوه وسكت الخبط افتكرت جوزي، طلعت على الأوضة لقيته نايم وشكله مقامش من النوم أساسا ولحد دلوقتي مش عارفة مين اللى خبط على باب الحمام، وأنا رديت عليه".
- القطة
وتذكر عمرو: "كنت نازل أرمى الزبالة على الساعة 2 بالليل، وكدة وبابا وماما عملين يلحوا عليا إني لازم أرميها، وأنا نازل النور قطع قلت الله يحرق البلد المعفنة دي، وبعدين سمعت أصوات غريبة كده أنا قلت ساعتها الليلة الزرقة دي مش هتعدي على خير، كل ده وأنا على السلم وفردة من الشبشب ضاعت، نازل بجيب الفردة لقيت راجل طالع بكشاف وبيقولى إحنا في الدور الكام بصوت مرعب كده، قولتله هي ناقصة رعب الله يحرقك، وبعد شوية لقيت النور جه قولت حبك يعني أن لازم أرمي الزبالة الساعة 2 بالليل".
وقال إسلام: "من أسبوع كنت لوحدى وحلمت بعفاريت وحاجات كده صحيت الساعة 2 بالليل قلقان طبعا، لقيت قدامى قطة اتفزعت، وفضلت أقول أعوذ بالله من الشيطان الرجيم لقتها جريت وجريت وراها بس ملحقتهاش، معرفش اختفت راحت فين، معرفتش أنام اليوم ده ومعرفتش استحمى كمان بصراحة".
- العروسة والظلام
وأضافت منار: "في مرة كانت بتفرج على فيلم عروسة كدا فيها جن، وكانت مرعوبة وأول ما الفيلم خلص، فجأة النور قطع وكان الكشاف مش مشحون أوى في نور خفيف، بس المهم كان عندى نفس العروسة، وقمت فتحت الباب وقعدت في الصالة والعروسة كانت على الكرسى وحطة النور عليها وعمالة أبصلها، وركزت عليها أوى وفجأة وقعت لوحدها على وشها أنا من ساعة أول مرة أعرف أن الإنسان ممكن يطير والنصيبة كانت لوحدى وجريت في الشارع".
وتذكر محمد: "مرة كنت في البيت لوحدي بالليل، ودخلت آخد دش لقيت باب الحمام بيخبط قلت يبقي أخويا وأمى رجعوا البيت فرديت وقلت حاضر هخرج، المهم إيه بقي خرجت ملقتش حد في البيت ومن ساعتها وأنا مش بدخل الحمام بالليل إلا لما يكون حد في البيت".