ليه قررت إنى اشتغل رقاصة أنا هقولكوا ليه قررت أشتغل رقاصة.. أصل أنا حبيت الدولة تكرمنى أيوه تكرمنى مستغربيين ليه!!! أيوه هشتغل رقاصة بس ادعولى بس إن أمى متعترضش أنى أشتغل رقاصه ولا الحاج يتهور ويحدفنى من البلكونة أصل أنا بقالى فترة شايفة أن الإعلام مهتم بالرقاصين وكل يوم في برنامج رقاصة شكل لا وإيه بيتكرموا وفي منهم كمان بياخدوا جايزة الام المثاليه فأنا على إيه أتعب نفسى في الشهادة الإعدادية وأذاكر واقعد استنى التنسيق على إيه كل التوتر ده أنا أقصر على نفسى الطريق واشتغل رقاصة بكرامتى أحسن وعلى الأقل الشعب المصرى هيعرفنى ويقدرنى وكمان هيحبنى أووى. أصل أنا لو عملت زى ال 11 اللى من شباب المخترعيين اللى لم يتخط عمرهم سن ال19 سنة اللى سافروا إلى مؤتمر جينيف للمخترعيين على مستوى العالم وحصلوا على المركز الأول وأخدو DNA دولية، دول بقى مجموعة من الشباب سافروا عشان يقدمو اختراعاتهم وبالفعل ال11 اتكرموا وخدو 7 ميداليات ذهبية و3 فضية وواحدة برونزية طبعا ماحدش يعرف عنهم حاجة غير أهلهم ليه بقى محدش يعرف عنهم حاجة عشان إحنا إعلامنا الحمدلله مش بيحب يجيب الحاجات الوحشة دى. يعنى ممكن يجيب واحدة حرقت جوزها أي حاجة من الحاجات دى المهم ال11 دول قالوا مش مهم الإعلام نشوف الجرايد اتفاجأوا إن مفيش حد جاب سيرتهم المهم عملوا نفسهم متفاجأين عشان هما عارفيين أن برضوا محدش هيكتب عنهم حاجه فبيصبروا نفسهم زى الست اللى اتكب طبيخها وجوزها راجع من الشغل جعان بتقول لنفسها اكيد هيستنى انى اعمل اكل رغم أن هي عارفة أنه هيجيبلها عاهة مستديمة بس بتصبر نفسها هما بالظبط كانوا عاملين زيها عارفيين أن محدش هيتكلم عليهم بس على فكرة الاعلام ملهوش ذنب في اللى حصل أصل الدولة ماهتمتش بيهم فاحنا عايزيين الإعلام يتكلم عليهم دا حتى ميصحش طب نيجى بقى عند وزارة البحث العلمى اللى كتيير اوى في مصر ميعرفوش إيه هي أصلا وزارة البحث العلمى الوزارة مهتمتش بيهم هي كمان. بس ال 11 متخلوش عن حلمهم وفي ناس سافرت على نفقة أهلها أكيد مش على نفقة الدولة يعنى وفي اللى أهلوا ادينوا عشان يحققوا حلم ابنهم وبالفعل سافروا عشان يحققوا حلمهم والحمدلله حصدوا 7 مدليات ذهبية و3 فضية و1 برونزية وقالوا عشان يصبرو نفسهم اكيد الاعلام منزلش حاجة قالوا ممكن يكونوا مستنينا في المطار. وفى المطار حصلت صدمة للكل أن مفيش حد واقف يستقبلهم انتوا مدركيين حالتهم النفسية في الوقت دا كانت عاملة إزاى أصل لو كان لعيب كورة وراجع كان زمان المطار كلوا واقف على رجليه ووزير الشباب على رئيس الوزراء على مندوبين ومساعدين وإية هيصة إنما بقى المخترعيين دول محدش كلف نفسه ووقف ليهم في المطار علشان حتى يقولهم شرفتونا أو رفعتوا راسنا أو أي حاجة اصل المخترعيين دول نسيوا وفكروا نفسهم لعيبة كورة عشان حد يبقى واقف مستنيهم في المطار إحنا كدولة مش بنهتم غير ب اتنبن أكيد يعنى مش هنهتم بالعلماء أو حتى بالمخترعيين إحنا دولة مش بنهتم بالتفاهات دى إحنا دولة بتهتم بالكورة والرقص اة والله احنا كشعب مصرى شعب عقيم في فكروا ونقعد نقول المخترعيين بيطلعوا برا البلد ليه؟ استنى كدا بجد انتو مش عارفيين ليه!! دول حتى مفيش حد بيقولهم كلمة حلوة لو حتى يشجعهم دول بيفضلوا يحبطوا فيهم لحد ما يقتلوا كل الحلوا اللى جواهم الدولة مش مقدرة أن ال 11 دول هايوفروا لمصر أد إيه دول هيوفروا ملايين ومليارات لمصر بدل ما بنجيب خبراء أجانب. بس احنا لو خدنا بالنا من حاجة ليه المخترعيين لما بيطلعوا برا مصر بينجحوا وبيتشهروا إه على فكرة ال 11 اتعرض عليهم عرووض لو أي حد سمعها يقول دول 100% مجانيين إزاى ميقبلووش عرض زى دا بس هما طلعوا بيحبوا بلدهم وقالوا لا. تقوم بقى بلدهم متقدرهمش حتى في خبر في جورنال لاء دول اعتبروهم نكرة ف على ايه بقى اذاكر واجتهد أو اخترع عشان يجيلى الإحباط دا كله لا أنا صحتى بالدنيا أنا أشتغل رقاصة واهى هترحمنى من جملتين: أول جملة سيبى الزفت اللى في إيدك ده إحنا مش في إجازة. تانى جملة هو أنتِ مش بتبطلى طلبات مش كفاية فلووس الدروس الخصوصية اللى مصت دمنا. عرفتوا ليه أنا قررت إنى اشتغل رقاصة عشان بس تقدروا العفن اللى احنا بقينا فيه.