آثارت شكوى فتاة على إحدى صفحات موقع التواصل الاجتماعى «فيس بوك»، ردود أفعال غاضبة بين مستخدمى الموقع، الذين استنكروا شكواها، حيث قالت فيها:«في فستان عجبني أوى وهموت عليه ب30 ألف جنيه، وخطيبي بيقول استحالة اجيب فستان بالمبلغ ده وكبرت في دماغي، وانا مش هتجوز غير لما اجيبه ده فستاني، ومن حقى البس اللى انا عاوزاه.. ياريت الطبقة الراقية اللى في الصفحة هي اللى ترد عشان هي اللى هتقدر مشكلتي». - قومى ياختى احلبى الجاموسة: استنكر محمد على شكوى الفتاة، قائلًا:«دانتي لو خطيبتي هطبق في زمارة رقبتك ومش هسيبها إلا لما ازمر بيها، قال طبقات راقية قال، انتي هتمثلي علينا.. يا مستفزة قومي ياختي احلبي الجاموسة عشان إخواتك يتعشوا». - ينفع تلبسي فستان أغلى منك: ورد عمر بقوله: «أنا راضي ذمتك ينفع تلبسي فستان أغلي منك.. ده أنتي مقشفة وريحتك واصلة الخرطوم.. استحمي الأول وإحنا هنلم من بعض ونأجر لك فستان ب 300 جنيه، وتقضي ليلتك يا عديلة يابنت صندوق». - هنجيبلك سبابة بالكهربا وقالت سارة:«ده إحنا هنجيبلك سبابة بالكهربا.. تسب لك طول النهار»، ورد محمود: «في ناس جوازتها واقفة على ألف جنيه ربنا يهديكم». - كل ما تطلعى تأكلى الفراخ تألفى قصص أما سما، فذكرت :«يابت ياسعدية انزلى من على السطح فضحتينا يخرب بيتك، كل ما تطلعي تأكلى الفراخ تقعدى في العشة تألفى قصص، يابت عيشي عيشة أهلك، وانزلى اغسلي المواعين بيقولوا المية هتقطع». - البخل ملوش علاقة بالمستوى: ورد أحمد: «عادى اقسم بالله كنت خاطب واحدة راقية جدا ومن عيلة كبيرة وهيا جميلة، ولكن أي حاجة اجيبها أنا اغلى حاجة، ولو ابوها هيدفع تبقى أقل حاجة، البخل ملوش علاقة بالمستوى ما تجيبه لنفسها مادام هيا من طبقة راقية ترتقى وتدفع هيا بس المشكلة مش في الدفع المشكلة في الاستغلال». - اوعى تتجوزيه وقالت هاجر ساخرة: «30 ألف إيه يابت، انتي هتقرعي انتي هتلاقيكي مخطوبة للواد حمادة ابن خالتك عفاف، وشغال على ميكروباص وياريته بتاعه لا بتاع عم نيازي وجوازتك واقفة على طقم جيلي والمروحة عليكي ولا على العريس، طبقة راقية ايه ده انتي اخرك صيدناوي، خليني ساكتة أحسن». وتابعت داليا: «خطيبك ده بخيل، اوعى تتجوزيه مش كفاية إنك متواضعة ومقدرة ظروفه وعايزة فستان برخص التراب جتها نيلة اللى عايزة خلفة».