باسم يوسف عن «تيران وصنافير»: «عاملونا إننا شعب»

وجه الإعلامي الساخر باسم يوسف، مقدم برنامج «البرنامج» سابقا، رسالة جديدة بشأن اتفاقية تعيين الحدود البحرية بين مصر والسعودية.
وقال «يوسف»، عبر صفحته الشخصية بموقع «فيس بوك»، مساء اليوم: «الموضوع مش إن الجزر دي مصرية ولا سعودية.. الموضوع إن شعبك بيعرف إن فيه جزيرتين اتاخدوا منه من الجرايد.. يعني لو فعلا هي سعودية، بتحطوها في مناهج التعليم ليه على إنها مصرية؟ أو تبع وزارة البيئة أو في الكتب التاريخية اللي بتتكتب من ميت سنة؟ كنتم تقولوا إنها سلفة».
وأضاف: «طيب لو فيه مفاوضات شغالة، ماقلتوش ليه؟ إيه بنود التفاوض والاتفاق؟ ليه الموقف التفاوضي المصري فجأة اتغير؟ ليه رجعنا الجزر دي النهاردة مش من عشر ولا عشرين سنة وأظن السعودية من عشر عشرين سنة كان عندها جيش وقوات وبحرية برضه».
وتابع زاعما: «يعني إيه تعامل شعبك كقطيع مالوش فيها عشان يصحى الصبح على الخبر ده؟ طب وضع الدستور اللي أنتم رقصتوم عشانه قدام اللجان؟ مش المفروض فيه استفتاء على الاتفاقيات اللي بتمس السيادة والأرض؟ طب مثلوا، طب اضحكوا علينا؟ طب عاملونا إننا شعب كده وكده زي ما بنعاملكم إنكم سلطة كده وكده»، على حد تعبيره.
يذكر أن الرئيس عبدالفتاح السيسي والملك سلمان بن عبدالعزيز، خادم الحرمين الشريفين، قد شهدا توقيع اتفاقية تعيين الحدود البحرية بين البلدين.