حالة الجو «حار رعد برق ممطر» تثير جدل نشطاء التواصل الاجتماعي.. ماريا: نقطع علاقاتنا مع أوروبا ييجي الجو حر بالسرعة دي.. شيماء: مصر دخلت النار.. عبد الله: الجو جامد محدش عارف حر ولا ساقعة

شغلت حالة الجو عددًا كبيرًا من نشطاء مواقع التواصل الاجتماعي "فيس بوك وتويتر"، النشطاء عبروا عن حيرتهم من توصيف حالة الجو، فالبعض وصفه بجو موجة كوميدي "حار رعد برق ممطر"، في حين عبر آخرون عن حالة الضيق والملل من حرارة الجو الشديدة في شهر أبريل، مرجعًا حرارة الجو للحالة المتوترة بين مصر وأوروبا.
برد ولا حر
قالت ماريا كوين: "أنا حرانة أوي، الجو مولع أنا شغلت التكييف، إيه ده هو إحنا هنقطع علاقاتنا مع أوروبا ييجي الجو حر بالسرعة دي".
وأضافت شيماء محمد: "هو الجو حر بجد ولا مصر دخلت النار".
وعلق عبد الله عرب: "الجو جامد محدش عارف له وضع، ساقعة ولا حر ولا هوا ولا إيه بالضبط بس حاليًا الجو جميل".
ورد جمال محمود: "الجو مش حر الجو عامل زي موجة كوميدي صيف شتا رعد برق".
ياسمين محفوظ: "أهو ميكونش كرم الضيافة يكون لدرجة إننا نخلي الجو خليجي عشان الملك سلمان ميحسش بالغربة".
نار العندليب
وقال محمد عبد الخالق: "جرايم القتل المفروض تقبل عذر.. معلش أصل كان الجو حر فقتلته".
وأضاف محمد مبارك: "فينك يا حليم الجو حر نار، وبعدين قال جانا الهوا جانا، إحنا حنكدب لو الحب نار حاسب تتلسع وبعدين هو الهوا بييجي عند أي حد دة على أساس أنه بيمشي".
وعلق لورانس: "الجو حر ولسة ف شهر 4 أومال لما نوصل شهر 8 هيحصل إيه؟"
وتابع زيرو: "يا اللي بتسأل عن الحياة الجو حر خش نام".
دنيا بهاء: "أنا عمري ما سمعت إن الجو حر في شهر أبريل أو رعد ورياح وفوق كل دة مطر وحر تاني".
دمار الكوكب
وقال نصري النينو: "الأستاذ منسق حفلات ورئيس جامعة القاهرة.. تحية طيبة وبعد.. الجو حر فسيب كل واحد يلبس اللي هو عايزه".
وأضاف حسونة: "الجو حر ودرس إبراهيم فؤاد اتلغى... نلحق نصلي قبل ما الكوكب يدمر".
ورد أحمد حمقة: "معروفة الجو حر يعني مفيش مذاكرة".
وتابع علي مجدي: "صاحي متأخر والجو حر بس هوا ساقع.. الفطار بتاع شاي بلبن وكب كيك دة، الجو محسسني إني في مصيف".
وقال عزام: "طالع البلكونة لقيت الجو حر قمت لافف وراجع تاني".
وأضاف خالد عمرو: "الجو حر وهولع والدنيا برة رعد ومطرة.. هو دا الربيع اللي بييجي في الكارتون؟"
وتابعت مريم الفطاطري: "ومحدش عارف إذا كان الجو حر ولا برد".