أطرف أسباب «فسخ الخطوبة».. سارة: «بيحب الفراخ أكتر مني».. شهاب: «مكنتش بتعرف تعمل محشي».. مارسلينو: طلعت أهلاوية.. أبوزيد: كانت بتحط صورها على فيس بوك.. مصطفى: عشان الجزمة.. ومحمد: بسبب حماتي الرخمة

دشن عدد من نشطاء موقع التواصل الاجتماعي «فيس بوك» «إيفنت»، بعنوان «سيبتوا بعض ليه؟»، ليحكي كل فتاة وفتى مصري عن الأسباب الحقيقية، التي دفعتهم لأن ينفصلوا عن بعضهم البعض، سواء في حالة الخطبة أو الزواج أو الارتباط، وتم دعوة 107 آلاف للإيفنت، وحصل على اهتمام 11 ألفا.
نسبة الانفصال
كتب منظم الإيفنت: «من وجهة نظرك كام تصل نسبة الانفصال بين الإثنين بسبب الماديات والحياه المعيشية؟؟؟».
وأضاف محمد عصام: «فرق في المستوى المادي زي ما كل الشباب بيعاني، يعني انا كنت عالي قوي عليها وحسيت انها هتحسدني وكده، فقلت تغور في داهية احسن»، وذكر أحمد لوكا:«قالتلي أكلني في كنتاكي وانا بقسط تمن حلاقتي».
وعلق أحمد شهاب بقوله: «مكنتش بتعرف تعمل محشي.. وأنا المحشي عندى أسلوب حياة»، وتابع أبوزيد محمود: «كانت بتحط صورها على فيس بوك.. دا فيها كتير. ليه أمة لا اله الا الله تشوفها يعني«.
الرخامة
وقال مصطفى بدر: «مش بتستحمل تلبس الجزمة طول الوقت»، وأضافت تسنيم نيما: «أصل إحنا بنعرف ناس.. تخيلو ماستحملش رخامتي»، وتابع كمال الدين محمد: «المستقبل أهم.. هختار طريقي لنجاحي وده حلم وإن شاء الله يتحقق»، وعلق مارسلينو نادي: "دي طلعت أهلاوية يا عم.. ده قلتها أحسن».
وقتي مشغول
وقالت آلاء ونيس: «علشان وقتي مشغول.. مش فاضية للكلام دا»، وأضاف كريم هجرس: «كنت ماشي معاها في الشارع فجأة الدنيا مطرت.. راحت ملامح وجت ملامح النور اللي في وشها انطفى»، ورد أحمد سامي بقوله: «بص في الحالات ديه خلي معاك مشمع اللي بنغطي بيه الغسيل في المطرة عشان ما تتفاجئش تاني».
وتابع أحمد كمال: «سبنا بعض ليه، تصدق سؤال وجيه.. سبنا بعض لأننا عمرنا ما كنا مع بعض مش مع بعض مكانا ولا دماغا ولا اهتمامنا ولا أي حاجة، ف إحنا حتى ف العلاقة كنا سايبين بعض اكلينيكيا، بس الاعتراف بالحق فضيلة انا غلط في حقها وهيا سامحت بس بعدت وبكتير، وفي الوقت اللى هيا عملت فية كدا انا مكنتش مدرك اننا هنوصل لمرحلة ال "bye bye kampora"، واذ فجاة بكلمها عشان اصالحها وبتاع تقوللى انا اتجوزت ومبقاش ينفع نتكلم تانى سمعت الصوت اللى طلع منك دا طلع منى ف وقتها كتيير بس مكنتش مصدوم اللى بيحب حد بيتمنالة الخير، وبس كدة وسبنا بعض حاجة مؤثرة جدًا صح».
حماتي رخمة
وكتب محمد عبدالمجيد: «عشان الولية حماتي دي رخمة ودمها تقيل، وعايزة هدية ف عيد الأم. يا ولية روحي هو أنا لاقي أكل»، وأضاف أحمد عبده: «عشان جالها عريس جاهز من مجاميعه، وأنا كنت مستني لسه أرباح كيو نت بس الشهادة لله كانت صريحة معايا، وقالت لي وش أنا محتاجة عريس غني وطلعت أصيلة عزمتني أنا وأمي ع الفرح وروحنا وكان يوم جامد بصراحة العريس كان مكلف»، وتابعت سارة عماد الدين: «بيحب الفراخ أكثر مني».