كوكب تانى

طلب زكي أفندي مندوب رئاسة الوزراء من عبد العظيم أفندي رئيس الوحدة السرية للمشروع المصري لغزو الفضاء أن يتعلم اللغتين اليابانية والصينية بناء على أوامر رئيس الحكومة لأن هناك وفدًا مصاحبًا له من الدولتين سيزور الوحدة بما يبشر بانفراجة للمشروع كي يرى النور وهو ما قابله عبد العظيم أفندي بسخرية إذ إن العلاقة بينه وبين اللغتين كعلاقة العرب بكواكب الفضاء..
***
رئيس الحكومة: بقالك مدة بتلح في طلب مقابلتي، أديني معاك أهو يا سيدي قولي بقى عايزني في إيه وعلى الله متكونش حاجة هايفة..
عبد العظيم أفندي: هو المشروع المصري لغزو الفضاء دا يبقى حاجة هايفة يا سعادة البيه دي حاجة هترفع راسنا فوق..
رئيس الحكومة: يعني هو إحنا راسنا في الأرض يا عبد العظيم أفندي إحنا مصر أم الدنيا..
عبد العظيم أفندي: على رأسي من فوق يا سعادة البيه لكن عايزها توصل للسما كمان وتبقى أم الكواكب وست المجرات وعمة المجموعة الشمسية كلها..
رئيس الحكومة: شكلك غلباوي يا عبد العظيم أفندي ولكلك لكلك على الفاضي.
عبد العظيم أفندي: لكلك الله يسامحك يا سعادة البيه.. عموما أنا طلبي محدد إحنا بعتنا مركبة فضائية استكشافية تجريبية عليها اتنين من الرواد المصريين بهاء وبهية لكن المركب زي ما تقول جنحت مننا ومش عترانين فيها والمشروع كله مهدد بالفشل..
رئيس الحكومة: وعايز مني دلوقتي إني أطلع أدورك عليها ولا أنده وأقول في مركب تايهة يا ولاد الحلال اللي يعتر عليها يبعتها مصر..
عبد العظيم أفندي: الله ينور عليك وعلى أفكارك أهو إحنا عايزين نعمل كدا بس مع اختلاف التفاصيل إحنا عندنا الخطة وعلشان ننفذها لازم الضوء الأخضر من معاليك..
رئيس الحكومة: قول واشجيني يا عبد العظيم أفندي قول يا عظمة..
عبد العظيم أفندي: يا أفندم إحنا هنكشف عن اختراعنا دا للعالم كله ونقول إن إحنا نجحنا في إطلاق المركبة الفضائية..
رئيس الحكومة: يا سلام طب مش أنت بتقول إن المشروع دا سري..
عبد العظيم أفندي: خلاص مبقاش سري إحنا هنعمل مؤتمر صحفي كبير وحضرتك اللي تعلن عن المشروع دا وشوف بقى معاليك رد فعل الشارع والبرلمان على كشف علمي زي دا دي حاجة كدا زي السد العالي يعني مش بعيد الناس تهتف باسمك وتفضل رئيس الحكومة لميت سنة جايين..
رئيس الحكومة: أممم واضح أنها فكرة كويسة ودخلت دماغي ويا ريت نلحق نعملها قبل عرض برنامج الحكومة على البرلمان..
عبد العظيم أفندي: هنلحق يا أفندم هنلحق بس دي نص الخطة بس..
رئيس الحكومة: أنت هتنقطني بالكلام قول خطتك على بعضها وخلصني..
عبد العظيم أفندي: إحنا للأسف هنقول إن المشروع فشل
رئيس الحكومة «بغضب»: يعني عايزيني قبل ما أعرض برنامج الحكومة أقول إني كنت بصرف المدة اللي فاتت دي كلها على مشروع فاشل شكلك خرفت وعايز تستريح في بيتكم..
عبد العظيم أفندي: يا سعادة البيه سبني أكمل إحنا مش هنقول بالحرف كدا إحنا هنقول إن في دولة معادية استهدفت المركبة الفضائية علشان تخرجها عن مسارها وطبعا مش هنقول اسم الدولة دي..
رئيس الحكومة: طب وهنستفيد إيه احنا بقى..
عبد العظيم أفندي: إن كل دولة هتحاول تبرأ نفسها وتسخر التكنولجيا بتاعتها علشان تدور معانا على المركبة الفضائية بتاعتنا..
رئيس الحكومة: عفارم عليك وعلى أفكارك انت لازم تبقى وزير في الحكومة الجاية..
عبد العظيم أفندي: يا باشا أنا مش عايز غير رضا معاليك.. وامتى بقى الحكومة الجاية يا ريس..
رئيس الحكومة: في المشمش يا سي مشمش.
عبد المنصف أفندي: عبد العظيم أفندي يا عبد العظيم أفندي..
عبد العظيم أفندي «بفزع»: إيه في إيه..
عبد المنصف أفندي: يا عبد العظيم أفندي أنا بقالي ساعة واقف جنبك وعمال أكلمك وأنت في ملكوت تاني خالص إيه سرحان في إيه كدا..
عبد العظيم أفندي: في المشمش يا عبد المنصف أفندي في المشمش..