خالتي صفية والجير

يوم الخميس الماضي وبعد أن أذاع التليفزيون الإعلان الدستوري الديكتاتوري شعرت أن مصيبة وحلت على البلد، فهل هناك مصيبة أكتر من أن يعلن الرئيس نفسه إلهاً ويرجعنا لورا سبع تلاف سنة ويقول أنا الفرعون الجديد، وبينما أنا منغمس في التفكير في الإعلان الصدمة فوجئت بصويت في الشارع، طبعا جريت لمصدر الصويت وتصورت أنه من توابع الإعلان الدستوري وإن الناس شعرت بالصدمة وانفجرت صويتاً، لكن وجدت مصدر الصويت طالع من بيت خالتي صفية (أولاد الشارع كلهم بينادوها بخالتي صفية فمنذ أن جئنا إلى الدنيا وملامح وجهها الذي امتلأ بالتجاعيد وأطراف شعرها الأبيض كما هي لم تزد أو تنقص ودار بينا هذا الحوار
* مالك يا خالتي صفية أنتي بتصوتي عشان الإعلان الدستوري.
* الحقني يا أخويا ولاد الكلب العيال وهما بيلعبوا كورة قطعوا شيكارة الجير اللي كنت هبيض بيها الأوضة للواد مصطفى ابني.
* شيكارة جير إيه يا خالتي صفية بقلك إعلان دستوري مصيبة.
* إلهي يشيل ويحط عليهم.. إلهي يخرب بيتهم.. إلهي يبتليهم بمصيبة.. إلهي ربنا يقطع سلسالهم.. متعرفش مين يا خوي اللي عمل كدا.
* مرسي يا خالتي هو اللي طلع الإعلان.
* يا خوي إعلان إيه أنا بقلك على اللي قطع الشيكارة.
* شيكارة إيه يا خالتي بقلك إعلان دستوري قطع فينا كلنا.
* إلهي يا خدهم البعدة.. إلهي أهاليهم تشرب نارهم.. إلهي ما يوعوا يكسبوا.. متعرفش يا أخوي ابن مين اللي عمل كدا أروح أرد عليه عشان يربي ابنه.
* (وأنا سرحان ولا أتابع كلامها): بديع يا خالتي.
* بديع مين يا خوي أنا بقالي سبعين سنة في الشارع معرفش حد بالاسم دا.
* شارع إيه يا خالتي أنا بقلك مرسي من جماعة بديع لو عايزة بقي تروحي تردي عليه عشان الإعلان.
* مرسي مين وبديع مين.. أنت هتجنني يا ابن "...." (وطبعا قالت اسم أمي ومفيش داعي لنشره).
* يا خالتي أنا في مصيبة الإعلان الدستوري.
* إلهي ما يوعوا يتهنوا.. إلهي أشوف فيهم يوم أسود زيهم.. إلهي يقعدوا في بيوتهم مكسحين.. دي الشيكارة كانت بتلاتين جنيه.. قولي يا أخوي هو مرسي دا كان بيلعب معاهم.
* الظاهر يا خالتي كله بيلعب على كله.. ادعي يا خالتي يمكن تستريحي.
* إلهي يبرد ناري.. إلهي يشيل ويحط عليهم.. إلهي اللي قطع شيكارة الجير.. وعمل الإعلان ربنا ياخدهم في يوم واحد.
وضحكت من هذا الدعاء الأخير وحسيت أن خالتي صفية نسيت مصيبتها وافتكرت مصيبتنا كلنا.