سيديهات "مرسي" والإخوان!!

دخل علىّ المفعوص أبو نص لسان وقال لى: بابا بابا.. تعالى اتفرج على فيديو "المثتشار مرتضى منثور" أبو دقن على ال"يوتيوب".. فقلت: وهل عاد من جديد؟ والله ليه شوقة.. كان بيسلينا ويضحكنا بتعليقاته وسيديهاته.
ما أن جلست أمام الكمبيوتر إلا وشاهدت أمامى فيديو للخطاب الأخير للرئيس محمد مرسي في مسجد "عمر مكرم" بأسيوط .. فقلت ل"أبو نص لسان" فين "مرتضي"؟.. قال: متثتعجلش.. كمِّل الفيديو للآخر وأنت تعرف..
شاهدت الفيديو وبدأ "مرسي" يخاطب الأهل الأحباب وفلذات الأكباد.. ويؤكد لهم أنهم في العقل والقلب والعين والرأس.. وفي المخ واللسان والطحال والفشة والممبار.. وأنا وأنت..
وإذ فجأةً أحمرت عين "مرسي"، وانتفخت أوداجه، وبرزت أنيابه.. واستقام إصبعه السبابة وهو يشير به أعلى وأسفل.. إلى الأمام وإلى الخلف.. متحدثًا مثرثرًا.. مهددًا متوعدًا الكذب والكذابين.. والفساد والفاسدين.. والقتلة والمجرمين.. ولن يهدأ له بال.. ولن يغمض له جفن.. والكلام النحوى ده..
وتابع واستطرد.. وأطنب وأسهب وتحدث عن التسجيلات الخاصة بالمواطنين.. وقال: إحنا عارفين كل حاجة عن أى واحد.. عارفين مين اللى عليه شيكات ومين اللى عليه وإيصالات أمانة، ومين اللى ماضى على كمبيالات.. مين اللى بيدفع كاش.. ومين اللى بيشترى بالقسط ومين اللى مش بيعرف طريق المحال خالص..
وأضاف وأوضح.. لدينا تسجيلات عن الجميع.. مين اللى كان مع الثورة.. ومين اللى كان ضدها.. مين اللى كان بيدعمها ومين اللى كان عاوز يقتلها.. مين اللى خرج في مظاهرات 25 يناير.. ومين اللى رفض الخروج بأوامر "الأسياد".. مين اللى بكى على "المخلوع".. ومين اللى لطم على "الاستبن".. مين اللى بيركب الأتوبيس و"مين اللى بيركب على الثورة"..
نظر إلىّ أبو نص لسان وقال إيه رأيك.. الرئيس بيقولك تسجيلات وسيديهات لكل واحد.. زى "مرتضى منثور" ولّا لأ.. قلت له عند حق يا مفعوص.. دا "مرسى" ناوى يأخد التوكيل من مرتضى.. وشكله هيتفرغ لفتح ملفات ومستندات وفضايح كل واحد.. والله شكلها هتحلو معاه.. ومش بعيد كل الفضائيات تستضيف "مرسي" للحديث عن السيديهات دى .. ونشوفها بقى صوت وصورة.
زغدنى أبو نص لسان وقال لي: فوووق يا حج.. مرسى دلوقتي بقي ريس.. قلت له يعنى إيه.. قال لي يعنى مصيبة.. يعنى ممكن تكون كل مكالماتك بتتسجل.. وبالتأكيد هيمسكوا عليك ذلة.. يا تبقى مع "الإخوان" يا تبقى مع الناس "التانيين"..
قلت تقصد مين يا واد بالناس التانيين دول.. قال أقصد الناس اللى قاموا بالثورة بجد.. مش اللى ركبوا عليها.. ودلدلوا رجليهم.. وباعوا الدم.. وجابوا الهم.. وهيخلوا الشعب كله جعان و"عريان"..!!
قلت له "شااااطر" يا أبو نص لسان.. طول عمرك "برنس" وبتفهمها وهى طايرة..!!
ربنا يستر يابنى!!