جماعة الأمر بالملفوف و النهى عن البورجر!

«اللي هيؤمرني بالمعروف .. هعمل معاه المنكر».. هكذا رد الشباب على ما تناقلته وسائل الإعلام عن تشكيل هيئات للأمر بالمعروف والنهي عن المنكر, واتهم الشباب جهات أمنية بالوقوف وراء تلك الحوادث, وهو ما جعلهم ينسجون العديد من القصص الخيالية حول تلك الجماعة.
حمادة اليماني : كنت بشتري فاكهة من محل فكهاني, ودخل اتنين ملتحين وسألوا البائع : البطيخة دي حمرا ولا قرعة ، قالهم حمرا ... راحو ضربينه بالسيف طيروا رقبته ، قلتلهم حرام عليكم ليه كده ؟ !! قالولي علشان مقلش « إن شاء الله « .. وأنا بصراحة اقتنعت.
عادل معوض : وانا ماشي كنت باكل سندوتش طعمية لقيت اثنين لحيتهم واصلة للأرض دخلوا عليا وبصوا علي السندوتش وابتسموا ومشيوا.. ندهتلهم وسالتهم: انتوا مين؟ قالوا: إحنا جماعة الأمر بالملفوف والنهي عن البورجر؟
نبيل صادق : و أنا ماشي النهاردة قابلني واحد ملتحي قالي مهددا: «ثكلتك أمك.. قولته: ربنا يسامحك, ليه؟.. قالي: اترتدي قميص نصف كم يا فتى؟! .. قولتلو ولسوف اتصلن بلميس الحديدي قالي هو ده المطلوب خد نمرة تليفونها وانا اسيبك.
باسم علاء : كنت رايح اشترى فوار من الصيدلية عشان عندى حموضة ... قابلنى واحد ملتحى وقاللى خسئت .. أين لحيتك .. وطلع سيف وكان عايز يقتلنى ... بس انا الحمد لله صحيت من النوم .. حد معاه رقم وائل الابراشى أبلغه بالحلم ده ويعملى حلقة.
وعن اكثر الجرائم بشاعة سردت عبير غانم قصة احد اعضاء الهيئة : بس يا سيدي وقام واحد بدقن هد اربع بيوت وغرق سفينتين و قتل 13 واحد واغتصب 8 بنات وذبح 28 طفل وزرع فدان بانجو وتاجر في الحشيش وفتح بيت دعارة ووقع طيارتين.
ووجه محمد القبرصلي نداء إلي هيئة الأمر بالمعروف والنهي عن المنكر برجاء سرعة التوجه إلي شارع الهرم ؛ المنكر هناك علي قفا منين يشيل ولا مفيش أوامر تروحوا هناك؟!
بينما هدد طارق مصطفي : أنا اللي هيجي يؤمرني بالمعروف هعمل معاه المنكر .. اعتقد الرسالة وصلت يا أمن الدولة.