فى السوبر ماركت

بقلم : طارق حسن من مدونه هذا ما رأيت في دبي
دخلت السوبر ماركت قلت اشوف الاسعار عاملة إية ، كل شوية واحد يقولى
الاسعار غالية ، الاسعار غالية .وكمان اشترى شوية فاكهة وشوية خضروات ،
الواحد فى مصر كان متعود موز ، تفاح ، خيار ، خس ، الفيتامينات والحديد
والحجات التيك اواى (^^) .
اول ما دخلت لقيت فى وشى الموز قلت حلو قوى ، مسكت موزاية وقلت بكام
الموز ، هاو ماتش، قالى 0.75 درهم قلت اية دا بجد الكيلو ب 0.75 درهم
قالى لا الصابع ، البناناية ب 0.75 درهم، رميتها من ايدى وقلت اعوذ
بالله ، طيب التفاح بكام ، قالى الواحدة بدرهم، إرمى..طيب الخيار حبيبى
بكام ، قالى الكيلو ب 6 درهم قلت نعم احنا فينا من كدا، حتى الخيار ..دا
أنا انضحك عليا بقى وشكلى هشحت على أخر الشهر .قلت اكمل اسئلة واشوف
هشترى اية فى الاخر ، طيب كيلو الطماطم بكام ، قالى ب 5 درهم ، طب الخس
بكام ، قالي الواحدة ب 4 درهم ..يا يهوى ..يا يهوى...دا احلى خساية فيك
يا مصر ب 50 قرش ودى متجيش نصها كمان....وبنقول الاسعار غالية فى مصر !
يا حبيبتى يا مصر يا مصر ، يا حبيبتى يا مصر يا مصر .
قلت فى نفسى الحجات دى كلها قشور ممكن نستغنى عنها ، خلينا فى الاساسيات
، الرز بقى ،كيلو الرز بكام قالى ب 8 درهم ..كان هيغمن عليا على طول ،
انا عمال اضرب السعر بالمصرى فى كل حاجة كيلو الرز ب 12 جنية ، الخساية
ب 6 جنية ، كيلو الخيار ب 9 جنية ، التفاحة ب 1.50 حنية ، الموزاية
بحولى جنية .لية كدا، دا حرام والله ، ربنا ميرضاش بالظلم ، شكلى هشوف
ايام ميعلم بيها إلا ربنا . الحاجة الوحيدة اللى لقيتها رخيصة هى الكانز
، ودا اللى كنت مستغربلو، علبة الكانز ب 1 درهم بس .
ومكدبش عليكوا ، مشترتش اى حاجة من الحجات إللى فوق دى كلها ، زى ما قلت
دى كلها قشور(^^) ، اللهم الا قزازة ماء و فرشاة و معجون وكانوا غاليين
والله بس هعمل اية، مضطر يا جماعة.
حمدت ربنا إنى سمعت كلام أمى وجبت معايا ألاكل غللى كانت مجهزهولى ، أكل
يكفينى اسبوع على الاقل ، رز ولحمة وفراخ وجبنة وشوية طماطم وخيار وخبز ،
ربنا يجازيكى عنى خير يا أمى .
قلت لما اخلص الأكل اللى انا جايبة دا يبقى ربنا يسهل ، وانا فى الطريق
دماغى عمالة تحسب فى فرق الاسعار والمتوقع إنى أصرفة فى الشهر ، طبعا كل
الخطط والتوقعات إللى كانت محطوطة فى مصر تبخرت تماما . وبدأت أغنى وانا
ماشى ...يا ريتنى ، و غلطة ، إنسى .
يا ريتنى ... مجيت وفضلت فى بلدى .
غلطة ... إنى مسعمتش كلام الناس .
إنسى... إنك توفر حاجة .
دا احنا لسة بنتكلم على اول حاجة .. الاكل ، امال الحجات التانية هيبقى
فيها إية ، يارب سلم سلم.