الشعب يُكفر عن خطيئة البرلمان بالفرجة على «عبده موتة»

شعب اختار 64 % من أعضاء البرلمان إخوان وسلفيين.. ومع ذلك فيلم «عبده موتة» يجمع 12 مليون جنيه في أسبوع! إنها الشيزوفرينيا، كما وصفها شباب «فيس بوك» الذين أبدوا اندهاشهم من الإقبال الخرافي علي الفيلم، مفسرين الظاهرة بأنها محاولة لتكفير الذنوب بعد انتخابهم نوابا من التيار الإسلامي.. «فيتو» رصدت بعض التعليقات...
مراد فرحات: الشعب اللي راح كسّر السفارة الأمريكية عشان فيلم مسيء للرسول، هو هو الشعب اللي دخل السينما اتفرج على الفيلم ودفع من جيبه 12مليون جنيه، وإداهم للسبكي ودينا اللي بترقص على أغنية.. يا طاهرة يا أم الحسن والحسين.. شعب متدين بطبعه.
رقية عاصم: شعب يقطع نفسه عشان يخش يتفرج على فيلم »عبده موتة« وتيجي للانتخابات تلاقيه مدي للإخوان.. وحياة أبوكم بلاش تكفروا عن ذنوبكم في صناديق الانتخابات.
محمد القشاوي: «عبده موتة» عمل 12 مليوناً في أسبوع والإخوان والسلفيون كانوا واخدين 64% من البرلمان اللي فات وعاشت مصر حرة شيزوفرينيا.
محمد الشناوي: الوصفة السحرية للفيلم الناجح.. تجيب شوية رقاصات «دينا– بوسي» وتجيب شوية مزز «حورية فرغلي- رحاب الجمل».. حبة من فن الهجايص المنتشر عند الشعب المصري «أوكا- أورتيجا- شحتة كاريكا- محمود الليثي».. تنزل بيه ف 4 - 5 مهرجانات.. وشوية أكشن وحتة كده رومانسي.. وف الآخر البلطجي يقلب شيخ.. وبكده تبقى عملت فيلم ناجح «عبده موتة» وبقيت منتج جامد.
محمود فكري: السبكى هو واحد من القلائل اللى فى مصر عارف الشعب عايز إيه.. ومش كده وبس، بيعرف يديله الحاجة اللى عاوزها بأعلى جودة يطلبها، يعنى ابتذال كما يجب أن يكون.. لحمة كما يحب.. كل حاجة نفسه فيها بيلاقيها وعمره ما بيحرمه من حاجة جوه الفيلم.. بالإضافة إنه بيطلع فى الأفلام تحت شعار «بفنوسى يا كناب»... أنا بحييه الصراحة.. لأن فى أفلام كتير مبتذلة بتنزل فى السينما وهو الوحيد منهم اللى بيعرف يعمل إيرادات أقل ما يقال عنها إنها خُرافية.
مصطفى عيسى: دينا الرقاصة في فيلم عبده موتة ابنها جاله سرطان أول ما عرفت بصت في السما.. وقالت: ليه يارب كده أنا عملت إيه في الدنيا..؟ معلش يا دينا المؤمن منصاب.