أحمد عفيفي يكتب : قوم اقف وانت بتكلمني !!

ايوه انت .. بلاش استعباط ولف ودوران ولعب التلات ورقات .. السنيورة خلاص مبقتش معاك .. رجعت للي عارف قيمتها وحيحطها جوه نني عنيه .. بهدلتها في سنة .. اللهي ينتقم منك .. ومن كل اللي معاك نفر نفر .. خدت عروسة مفيش زيها اتنين .. بس الحمد لله .. مدخلتش عليها ولا لمست حتة من جسمها .. والا كانت جابت منك عيل متخلف .. جلده تخين زي أبوه .. عيل كان قضى على مستقبلها .. وبقى ابنها غصب عنها جي من بطنها .. الحمد لله .. الحمد لله انها حافظت على نفسها وعملت زي " فؤادة " .. وعتريس حيموت .. عايز حقه الشرعي منها .. بس كانت جوازة سودا وباطلة .. وانتهت واهل الدهاشنة كلهم .. كلهم .. راحوا القصر .. اخدوا أمهم وبنتهم .. وولّعوا في القصر باللي فيه.

ايوه انت يا سيد مرسي .. تقوم تقف وانت بتتكلم مع شعب مصر .. حتى لو كنت رئيس محترم وعادل .. تقوم تقف وعينك في عنيه .. احتراما منك للي جابك وخلاّك تقعد على الكرسي .. أما وانك لا انت محترم ولا تعرف العدل .. فتقوم تقف وانت بتكلمه وعينك في الأرض .. عارف يعني ايه عينك في الأرض ؟ .. يعني ماترفعاش فيه وتبص له .. مش بمزاجك .. انت لو حاولت مش حتقدر .. فعينك فين ؟ .. في الأرض .. خجلا وكسوفا وانكسارا أمام شعب وثق فيك .. فخذلته وبهدلته وأهنت بلده .. فخرج عليك بملايين غير مسبوقة في تاريخ ثورات الشعوب .. بكارت أحمر وقبلها ورقة .. لا شال سلاح ولا رشاشات .. ورقة مكتوب عليه " تمرد" ورافع علم مصر .. فقط علم مصر .. لا زيد ولا عبيد .. ولا اى حد ، من غبائك ، تصورت انه ورا هذا الطوفان .. لسه مش قادر تفهم - رغم انك للأسف مصري – ان الشعب ده شعب عظيم .. يصبر عليك ويشوف أخرك ويقولك بالذوق اتكل على الله .. حتعاند وتكابر وتعمل فيها عتريس .. يبقى حيجبوك من قفاك .. ويسلموك للقضاء اللي مسحت بكرامته الأرض .. وهو يعرف شغله معاك .. وبالقانون .. وزي المثل ما بيقول ان كنتوا اخوات اتحاسبوا .. وانت حسابك عسير .. يا سيد مرسي.

الجيش .. مش جيش خالتك .. ده جيش مصر .. ورجالته زي ما انت قلت رجالة دهب .. بس الشعب لما يقول رجالة دهب .. مش بيقولها عشان يستعطفه ويقف معاه .. لكن انت لما قلتها كانت رياء منك ونفاق رخيص .. عايزه في صفك .. عشان يحمي مش الشرعية .. يحمي الحرامية .. بس نسيت حاجة مهمة اوي .. ان ده جيش مصر .. مش جيش " حليمة " .. خالتك يا مرسي !!

انا سمعت الصبح الشيخ نبيل نعيم وهو كان زعيم جماعة جهادية .. يعني عاجنكم وخبازكم وعارف حركاتكم الوسخة .. عارفين قال ايه ودي كانت مفاجأة ليا انا شخصيا .. لما اسرائيل كسرتنا وهزمتنا في 67 .. كان أعضاء الجماعة في السجن .. عملوا فرح واتحزموا ورقصوا فشر دينا وفيفي عبده .. تخيلوا انتوا المنظر ومعناه .. مصر مهزومة - مش عبد الناصر - وشعبها موجوع ومكسور .. وناس بترقص م الفرحة .. عشان كده محدش يستغرب لما يقول مرشدهم طظ في مصر .. جواكم حقد وغل غير مسبوق .. تتحرق البلد وتروح في ستين داهية .. المهم تنفذوا مخططكم .. بالضبط زي اللي بتعملوه دلوقتي .. معندكوش مشكلة يموت مليون من هنا وهنا ، بس تنظيمكم يعيش .. وعشان كده الكل اتخلى عنكم .. مش غدر منهم ولا حاجة .. لكن عشان كشفكم ..

الشرطة ضربتكم بالجزمة ورجعت لحضن أهلها وناسها .. والجيش مش بمزاجه انه ينحاز للشعب .. ده واجبه وعقيدته اللي اتربى عليها .. بس عقيدة الوطن غير عقيدة الجماعة .. جيشنا يموت ويستشهد من اجل وطن وارض وعرض .. انما انتوا تموتوا -ولا يمكن تكونوا شهداء - من اجل جماعة وفرد .. هو ده الفرق اللي الشعب المصري كله شافه بعنيه .. فخرج عليكم طوفان .. ولو رجالة بتحبوا البلد ومصلحتها فوق راسكم .. انسحبوا بهدوء .. اعملوا حاجة واحدة بس نحترمكم عليها ويمكن نفغر لكم كل القاذورات اللي حصلت ، لو شفنا عاقل واحد منكم خايف ع البلد .. انما تولع البلد باللي فيها .. انتوا الخسرانين .. والحساب يجمع .. وانتوا حسابكم بقى تقيل .. تقيل اوي.

حاقولها تاني يا ابو جلد تخين .. قوم اقف وانت بتكلم شعب مصر .. وعينك في الأرض .. وانسى اى هبل ممكن تقوله .. شوية ذكاء بقى .. يخرب بيوتكم .. مدخلتوش مدارس خالص ؟!! .. انت خلاص بره .. شرعيتك المشكوك فيها سقطت .. " فلم الدور " وامشي بكرامتك .. وحاقولها لتالت مرة .. عينك في الأرض .. وانت واقف قدام الشعب المصري اللي علّم شعوب العالم ازاى تشيل رئيسك بكارت احمر وورقة!!