ديالوج

samirelgamel.@yahoo.com
جلسة طارئة جمعت قيادات المجلس الأعلى لعيد الفطر المبارك.. السيد اللواء بسكويت والدكتور كعك والمستشارة «غريبة» والخبير العالمى مستر «بيتى فور» كانت الجلسة ساخنة فى قاعة «الصاج» الكبرى وتحت رعاية «الفرن الأفرنجي» وفجأة دخلت عليهم الأنسة «عيدية» وطلبت تسجيل اسمها فى محضر الجلسة .. واعتراضها على هذا الاجتماع الطارىء وكأن العيد يأتى بدون مواعيد وبدأت المناقشات
بسكويت: يا حضرات أولا كل عام وأنتم بخير
كعك: والخير يجى منين يا سيادة اللواء بسكويت والأنسة عيديه داخله علينا بالحنجل والمنجل.. وكأنها هى رئيس المجلس الأعلى للعيد وأحنا ولمؤاخذة طراطير
بيتى فور: يا جماعة واحدة واحدة.. مالكم «خمرانين» على بعض أكتر من اللازم كده ليا.. دى أيام مفترجة!
غريبة: بطريقتها الناعمة، أنا مش فاهمه احنا جاين الاجتماع علشان نشوف حنحتفل بالعيد أزاي.. ولا جاين ناكل بعض!
عيديه: بذمتكم مش مكسوفين من نفسكم.. هى الناس لاقيه تاكل .. لما هتجيب بسكويت وكعك وغريبة ولا البتاع دا اللى اسمه بيتى فور
بيتى فور: لولا أنى ابن ناس وراقى كنت رديت عليكى يا بتاعة انتي!
بسكويت: مش معقول أنا كبير العقدة.. وبالفانيليا ومحدش عامل لى اعتبار
كعك: أحنا هنمثل ما تقول وخلص
بسكويت: أنا بصراحة شاكك أن حضراتكم خريجى فرن أفرنجي
غريبة: «متأثرة» بليز يا أونكل بسكويت أنا الجو المريب ده .. بيوترنى ويخلينى فتافيت ومش على بعض
كعك: بطلى دلع وسهوكة بقي!
عيدية: أحنا عشان وجود جماعة الإخوان على رأسى السلطة باقترح تغيير اسامى حضراتكم!
بسكويت: أنت بتخرفى تقوللى أيه!
عيدية: حيلك حيلك وفيها لما يبقى اسمك قراقيش أو ستوريك أو غريبة يبقى اسمها «قرصة»
وانسحبت «عيدية» بالفعل من الاجتماع وسط دهشة الحاضرين.. ولكنها عادت بعد قليل باسم جديد هو زكاة الفطر.. وخرست كل الألسنة وقاموا لها احتراما.. إلا الغريبة التى لم تستطع أن تتمالك نفسها.. وبناء عليه تم تغيير اسم المجلس كله ليصبح المجلس الأعلى للمراجيح!