sTates& tweets

خالد محمود تعليقا علي مراقبة الانترنت للبحث عن اللي بيشتموا مرسي: يا بيه ما هو لو قبضتوا على كل واحد شتم مرسي البلد كلها هتبات في السجن.
أسعد الأسيوطي : أنباء عن انسحاب الدستور نفسه من اللجنة التأسيسية للدستور.
إبراهيم الجارحي : الاستثمار الوحيد اللي ممكن يجيب همه في عهد مرسي هو انك تفتح محل حانوتي... وحدووووووه.
يسرى محمد: كنا بنسأل : يا تري د.مرسي يقدر يكمل 4 سنين ؟! دلوقتي بنقول : يا تري إحنا كشعب هنفضل عايشين اصلا ال4 سنين ؟!
مراد المغازي : مرشد الإخوان: حان الوقت لتتولى الجماعة المسئولية كاملة.. خلصنا مرحلة نص العمى وداخلين ع العمى كله.
حامد الأسطى : الاخوان بيعاملوا مصر زي الست المطلقة ،وجوزوها،وكل ما تشتكي يعايروها، ويقولولها مش احسن من جوزك الأولاني؟ انتي هتتبطري يا ولية؟
نبيل محمد: بيقلك مصر جت تنهض اتقلبت علي وشها.
‎هدير مسعد : «نموت نموت .. و تحيا مصر» بس يا سيدى و من يومها و مصر ما صدقت.
مهند عبد الهادي : هى الشهادة اللى مرسى رايح ياخدها دي حتأمن مستقبله . يعنى يقدر يتجوز دلوقتى ويفتح بيت ومحدش يعايره لأنه معهوش شهادة ؟
فوزي العوضي : هي تركيا بتحضر مؤتمر الدول الثماني الإسلامية ليه وهي أصلا دولة علمانية؟
حيبيعو لهم حاجة أكيد؛ التراكوة أشقيا برضه.
خالد الصاوى: الآن أقول بثقة إن مرسي صورة مصغرة من مبارك، صورة مكبرة من عصام شرف، وصورة باهتة من طنطاوي.
فادي النوبي: «احنا بنشترى راجل يابنى» .. تانى اكبر اشتغالة فى التاريخ بعد «انا هنام دلوقتى واصحى الصبح أبدأ مذاكرة بجد».
أحمد نور الدين : أنا من كتر الريفرش..حاسس إن الفيس هايطلع يقولي عليا الطلاق بالتلاتة مافيش حاجة جديدة.
ثروت محمد: كل حاجة بتيجى تغطى على حاجة يعنى حادث أسيوط جه غطى على غزة !و بدل ما الناس كانت بتشتم فى اسرائيل بقت بتشتم فى الحكومة.. ياترى إيه اللى هييجى يغطى على احداث محمد محمود؟
مصطفى عيسى: ادوا لمبارك فرصة - ادوا العسكر فرصة - ادوا الجنزوري فرصة - ادوا شفيق فرصة... ادوا هشام قنديل فرصة - ادوا الاخوان فرصة - ادوا محمد مرسي فرصة!.. في حد لسة مخدش فرصة ؟ الكابتن اللي ورا اخدت فرصة ؟ الآنسة اللي قدام اخدتي فرصة ؟ الاستاذ اللي قاعد ع الكنبة و حاطط اللاب اخدت فرصة ؟ ومحدش يقوللي فرصة بعجوة...... عشان الضغط عالي حبتين.
عمار مرتضى : عندي ليكوا خبر بمليون جنيه.. عاجل : في حادثة تدعو للتأمل.. سائق قطار مصرى يعبر بقطاره مزلقانا بمحافظة بنى سويف بنجاح كامل دون خسائر والحمد لله.