الزلزال والعاصفة الترابية يشعلان «تويتر».. عبير: «زمن الشقاوة رجع يا حسين».. بكار: «صافيناز بتحذر رامز من دلوقتي».. رحمة: «لو اتهورت وعملت محشي بقى هيحصل تسونامي».. وإسلام: «كل ده عشان الزمالك هيلعب»

دشن مستخدمو موقع التواصل الاجتماعى «تويتر»، اليوم السبت، هاشتاجًا جديدًا حمل عنوان «زلزال»، بعد الزلزال الذي ضرب القاهرة والمحافظات، وتصدر الهاشتاج أكثر الموضوعات تداولًا عبر الموقع، وتفاعل معه الكثير من المصريين، من جانبها رصدت «فيتو» أبرز التعليقات.
ويجا: «الزلزال صحاني وأنا نايم فضل السرير يرقص بيا قولت أن أنا بخرف وأنا نايم وكملت نوم صحيت لاقيته زلزال فعلا».
محمود باشا: «بتاع صافيناز صح».
جهاد محمد: «المهم اني صاحيه اتخانق مع ماما واختي افتكرتهم بيصحوني وبزعقلهم في ايه قولت مبحبش حد يصحيني لقيت نفسي لوحدي وبعدين اكتشفت أنه زلزال».
رحمة سعيد: «يعنى أول مرة ادخل المطبخ واعمل بلح الشام يحصل زلزال.. امال لو اتهورت وعملت محشى بقى هيحصل تسونامى».
بكار: «صافيناز بتحذر رامز من دلوقتي».
سارة: «الغضب نزل علينا بدل أمريكا ولا ايه زلزال وجو حر وعواصف بتراب».
مى شريف: «عاصفه ترابيه وزلزال الاتنين كل ده علشان قررت انزل افطر بره انا اسفه».
همس: «الحمد لله يارب كله جميل من عندك طبيعي يوم عظيم زي دا العاشر من رمضان يوم النصر ميمرش من غير زلزال عشان يذكر الصهاينة يوم ما زلزلناهم».
رحمة: «أنا قررت أطلع أقعد على المرجيحة وأهز رجلي جامد عشان ما أحسش لو في زلزال تاني أو توابع».
مصطفى الجندى: «يا عم زلزال مين باقي الفطار قرب».
علاء: «لا دي صافيناز كانت بتعمل بروفه لفيلم العيد».
ياسمين: «زلزال وعاصفة ترابية يوم عيد ميلادي !!!! كفاية متبسطهاش اكتر من كده».
عبير فريد: «أهو زمن الشقاوة رجع يا حسين بالزلزال».
بلال الشناوى: «عاصفة ترابية وزلزال حد يشوف ليكون حد عامل فينا مقلب من بتوع رمضان».
عمر مجدى: «نفسي يجي زلزال وأحس بيه، عمري ما حسيت به من أول ما اتولدت لحد اللحظة».
إسلام مجدى: «كل ده عشان الزمالك هيلعب النهارده».
منار: «هو أنا أغيب عن تويتر نص ساعة ارجع الاقيكوا بتقولوا في زلزال.. أنا مش حسيت بحاجة ماليش دعوة عاوزة زلزال».
وكان الدكتور أبو العلا أمين، رئيس المعهد القومي للبحوث الفلكية والجيوفيزيقية، أكد أن الزلزال الذي ضرب مصر في الساعة 5.34 دقيقة مساء اليوم السبت كان بقوة 5.2 على مقياس ريختر، مشددا على أن منبع الزلزال هو خليج العقبة.
كما شهدت جميع محافظات مصر، اليوم السبت، حالة سيئة من الطقس واجتياح عاصفة ترابية قوية البلاد مع ارتفاع درجات الحرارة، ما تسبب في غياب ملامح الطرق البلاد.