نص شهادة فتاة تعرضت للتحرش في السيدة عائشة

نشرت مبادرة «شفت تحرش»، اليوم الخميس، شهادة لإحدى الفتيات تعرضت للتحرش الجنسي منذ قليل أثناء وجودها في منطقة السيدة عائشة.
نص الشهادة
أنا لسه حاصلى حادثة تحرش من نص ساعة في ميدان السيدة عائشة كنت لسة نازلة من المكروباص وماشية رايحة أركب مكروباص تانى واحد كان ورايا قال تلميح جنسى قذر معناه أنه عايز ينتهكني لفيت وضربته على وشه بالقلم لقيته هيمد إيده رحت لطشت وضربته وشه التانى راح زقنى ووقعت على الأرض.. ناس جت مسكت فيه. وأنا قمت مسكته من التيشيرت وكنت عايزاهم ياخدوه معايا ونروح ع القسم بس معرفتش هما اكتفوا أنهم يضربوه وخلاص وكفاية عليا كده وشوية ستات اتلموا عليا عشان يفلتوه منى ومسكونى معرفتش أفلفص من إيدهم غير بعد ما مشي...أنا وقفت عندى حالة هستيريا عياط وصويت بيخرج مني مبحوح.. فعقدوا يقولولى خلاص يا حبيبتى بقى روحى هو اتضرب.. ما هو مشى هتجيبيه منين يعنى.. واللى تقولى اقعدى واجيبلك عصير أو تعالى اركبك والكائنات اللى تيجى تسأل هو إيه اللى حصل هو أنتى اللى اتضربتى.. الأغبى من ده كله إنى لما كلمت أخويا يجيلى قعدوا يقولولى ليه يا بنتى يتحرق عليكى وكأن المفروض أنا اللى اتقهر في صمت.