أسعار البامية والطماطم تشعل مواقع التواصل.. ظريف: «بفكر أقدم على قرض علشان عزومة رمضان».. عادل: «البامية على العريس والطماطم على العروسة».. ومكملين: «هتصور سيلفي معاهم»..وائل: «هيعلنوا ثورة البامية»

أشعلت أسعار البامية والطماطم سخرية النشطاء على صفحات موقعي التواصل الاجتماعي "فيس بوك" و" وتويتر"، بعدما بلغ سعر كيلو البامية 30 جنيها وكيلو اللحمة 85 جنيها والطماطم نحو 10 جنيهات، حتى أن النشطاء تحولوا من الحديث في السياسة إلى الحديث عن غلاء أسعار البامية والطماطم، ووصف البعض ذلك ب"ثورة البامية".
وقال محمد نبيه: " على رأي القائل كيلو البامية وصل إلى30 جنيها وأرخص كيلو لحمة وصل إلى 85 جنيها والطماطم بعشرة جنيهات! يعني عشان تاكل طبق بامية النهاردة لازم تقدم على قرض".
وأضاف عبد العزيز الكاشف: " هي بقت كده.. عندما يتحول تويتر من الحديث في السياسة إلى الحديث عن البامية ب28 جنيها والطماطم ب10 جنيهات".
وتابع ظريف: " بعد ما كيلو البامية وصل إلى 30 جنيها والطماطم 10 جنيهات والفلفل 8 جنيهات واللحمة 90 جنيها افتكر أن كل مواطن هيفكر يقدم على قرض من الآن عشان عزومة رمضان !!!!".
وقال حلاوتهم: " قاطعوا ( البامية والطماطم و.......) وسيبوا القوس مفتوح".
"البامية على العريس"
وأضاف عادل غراب: "البامية على العريس والطماطم على العروسة وربنا يكرمهم في طبختهم دى".
وتابعت جاسمين فوزي: "مش عايزين سعر البامية اللي بقت ب 27 جنيها والطماطم اللي ب 10 جنيهات تنسيكم إنهم قالوا الفرخة هتبقى ب75 قرشا وكيلو اللحمة بجنيه!!".
وقالت رانيا محمد: "البامية بشاير عشان كده غالية ومش جديد يعنى كل سنة بتبقى غالية والطماطم دلوقتي اسمها العروة عشان كده غليت فبلاش تمثيل أو انتوا مبتشتروش أصلا!".
وأضاف "شاي سكر جوا": "إيه ده الكهربا مبقتش تقطع، مفيش هري الناس تهري فيه؟؟ لا فيه عندك البامية والطماطم واهري يا شعب- شعب هراي بطبعه".
وتابع "زيجو": " كيلو البامية ب 25 بس واللحمة ب 80 بس والطماطم ب 7 بس يعنى البامية باللحمة هتكلفكوا 112 بس مش 135 يا ظلمة".
"سيلفي"
وقال "مكملين": " في أقرب فرصة هتصور سيلفي مع البامية اللى ب25 جنيها والطماطم أم 10 جنيهات دى فرصة متتعوضش".
وأضاف سيد محمود: "البامية ب 32 جنيها والطماطم ب 9 والخوخ الكويس مش أقل من 12 جنيها والخيار ب 8 جنيهات بس كده".
وتابع رامي المصري: " كيلو البامية بقى ب 28 جنيها يعنى أغلى من علبة السجاير والطماطم بقت ب 9 جنيهات شوية شوية هتلاقى البامية أغلى من جاريث بيل.. دنا بحبها والله بس خلاص بقى نقضيها كوسة".
وقال أحمد سالم: "كيلو البامية وصل ل28 جنيها والطماطم وصلت لستة جنيهات والخيار خمسة جنيهات لك الله يا مصر".
وأضاف محمود والي: "البامية ب30 جنيها والطماطم ب10 جنيهات وحط عليهم سمنة وتوم ومعرفش إيه يبقى 50 جنيها وفوقهم كيلو لحمة ب90 جنيها يبقى أكلة بامية ب140 جنيها.. محدش مطلع للغلبان".
وقالت "أم على": " محشى إيه دى الطماطم ب7 جنيهات والرز ب5 يبقى نعمله إزاى يعنى كلنا في الهوا سوا".
وقال حساب "مسخرة": " هو يعني إيه لحمة؟!! يا عم أبوس أي حاجه بس اسكت يعني البامية هتغلى والطماطم هتغلى وبتقول هتفرج أرمي نفسي من البرج ويقولوا انتحر!".
وأضاف سعد أحمد: " بلاش تنتحر لحسن ياخدوا من أهلك غرامة أشغال طريق ههههههههه".
وقال مدحت: " يقولوا البامية ب28 جنيها ولا بحبها والطماطم ب8 جنيهات ولا هشتريها، وورق العنب ب12 جنيها مش هاكلة والزبدة ب40 جنيها ولا يهمنى خالص والشقة 35 مترا عادى".
وأضاف حساب أنجل: " والفلفل الأخضر ب 8 جنيهات والباذنجان ب 5 جنيهات والملوخية ب 8 جنيهات، شوفتي بجد موضوع الفلفل ده صدمني أكتر من البامية".
وقالت أمل سليمان: " نحن شعب يظهر عكس ما يبطن ولهذا استطلاعات الرأي والبرامج والصحف تنشر غبارا في الأعين فقط، وبلاها البامية والطماطم صلصة وكوسة".
وأضاف وائل دسوقي: "مش فاضل غير إنهم يعلنوا ثورة البامية".