شلاليت

يا شعب مصر الحبيبة فكروا شوية
بيقولوا فيه ثورة قامت.. قلت فين هىَّ
لسه الرغيف زى ما هو حروفه متنيه
ومراتى بتقولى ما فيش بوتجاز ولا ميَّه
وكل يوم زى مانى فى همى ملهيَّه
متفهمونى الحكايه.. أيه جرى ليَّه
م المستحيل يا بلد راح أدنى منسيه
وحقنا بيسرقوا منا الحرامية
أنا قلت طب أعمل أيه.. أيه بس فى إيديَّه
يامراتى حبه إرحمينى من الهموم ديَّه
هو إنت زى الحكومة ما تسأليش فيَّه
راح أعمل أيه وللا أيه.. ما تفتحوا عنيَّه
المسئولين عننا فى الحكم ملهيَّه
وكل حبه يقولوا لنا بلاش مرازيَّه
ما تصبروا حبه خلو الشكوى مخفيه
تلاتين سنه بتصبروا والناس مطاطيه
وعشان فى ثورة وناس بتنادى حرية
بتفكرى فى لحمة وشوية ملوخية
يا ست فوقى بقى وكفاية ثورية
قالت لى بطل بقي.. الحلة مكفيَّه
وكل يوم ما تلاقيش غير فول وطعمية