وزير الداخلية يتظاهر ضد نفسه !

وزير الداخلية يطلب 27 خط تليفون بعدد محافظات مصر، والسبب الأحداث الملتهبة.

نهار داخلى...
المكان: مبنى وزارة الداخلية
الزمان: الساعة العاشرة صباحا
مكتب معالى الوزير...
الوزير يدخل مكتبه مكشرا ويكلم نفسه: والله الواحد زهق من الشغلانة دى خلاص أنا قرفت..
-يتنبه لصوت مدير مكتبه.. معالى الوزير صباح الخير
-الوزي: خير؟.. طب قول المصيبة الجديدة.. ما إحنا فى بلد فيها مصيبة كل خمس دقائق بدل ماكل خمس دقائق طفل بقى كل خمس دقائق مصيبة..

مدير مكتبه: أبدا معاليك.. أنا شايفك بتكلم نفسك قلت أطمن عليك بس يافندم ..
الوزير: تطمن.. طيب ياسيدى شايف الاوضاع تطمن قوى.. يابنى ده أنا بنام وبحلم بكوابيس ليل نهار...
مدير مكتبه: معلهش يافندم هتعمل إيه.. ده نصيبك
الوزير: المهم الخطوط كلها تمام؟....
مدير مكتبه: كله تماااام
-الوزير يدخل مكتبه، يجد 27 عدة تليفون ويبتسم يامسهل يارب
-يرن تليفون بورسعيد
-الوزير: نعم أنت مدير أمن محافظة إي؟...
-معاليك مدير أمن بورسعيد
الوزير يرن على الجرس لمدير مكتبه
مدير مكتبه: أمر معاليك
الوزير: هات خطاط يكتب على كل عدة اسم المحافظة عشان أعرف أنا بكلم مين ويتنبه لصراخ مدير الأمن.. الحقنى يافندم الوضع سيئ جدا..
الوزير: هات لى محافظة هادية ياسيادة اللواء..
مدير الأمن: يافندم وبعدين عايزين حل..
الوزير: ربك يحلها من عنده
مدير الأمن: الشعب هنا مش ساكت
الوزي: أنا نفسى أعرف حبيب العادلى كان مسيطر إزاى؟!!!
مدير الأمن: والله الناس كلها عارفة.. لكن ده مرفوض دلوقتى
الوزير: نصبر على الشعب شوية.. يمكن ربك يصلح الحال..
-يرن تليفون تانى وتالت ورابع وخامس وسادس وسابع وتامن.. والوزير ينظر من غير أن يتكلم....

مدير أمن بورسعيد يصرخ: يافندم روحت فين معاليك؟..
الوزير: أنت مش سامع ياسيادة اللواء كل الأصوت دى.. خليك معاى أكلم السويس الأول.. لا أكلم المنيا.. لا أكلم بنى سويف، لا أكلم سوهاج لا أكلم قنا، لا أكلم الفيوم لا..... إيه رأيك ياسيادة اللواء.. أقول حادى بادى أحسن وأريح نفسى.....

مدير الأمن: والله كان الله فى العون يافندم.. أسيبك فى همك بقى.. "جيتك يا عبد المعين لاقيتك ......!
الوزير: أن احترت ياربى أرضى مين ولامين، القيادة السياسية ليها طلبات، والشعب ليه طلبات، والإخوة ليهم طلبات، والعيال ليهم طلبات والضباط ليهم طلبات، وأنا لى طلبات.. مين يحقق كل الطلبات دى؟.. وينظر إلى أعلى قائلا: يارب أنا أسيب الوزارة ولا أحسن حاجة أسيب البلد، وأرتاح. ويهم بالخروج ولكن التليفون الأحمر يرن
رئيس الوزارء: معالى الوزير عايز تقرير عن الموقف الأمنى بعد ساعة ضرورى..
الوزير: يافندم أنا خلاص...

رئيس الوزراء: يقاطعه هايل طول عمرك جاهز.. أنا فى انتظارك.. سلام...
الوزير: لا لا.. أنا لازم أسيب البلد دى خالص.. ده أنا لسة هاتكلم يقول هايل لالا.. ويهم بالخروج..
-التليفون البمبى يرن..
الوزير: يا إخوانا حرام أنا تعبت سحل وسحلنا.. ضرب وضربنا.. قنابل وقنبلنا.. وشتيمة وشتمنا.. وفضائيات وطلعنا.. وفضايح وتفضحنا.. يضرب يدية ببعض.. أعمل إيه تانى ويخرج من مكتبه مسرعا ويلحقه مدير مكتبه رايح فين يافندم؟...
الوزير بغيظ: رايح أتظاهر..
مدير مكتبه: نعم.. ضد مين يافندم؟..

الوزير: ضد وزير الداخلية، ويخرج، ثم يرن التليفون البمبى..
-يرد مدير مكتب الوزير ويسأل...
-المتصل: فين الوزير يابنى؟...
-راح يتظاهر يا فندم...
المتصل يضحك: أنت مسطول يابنى؟..
مدير مكتب الوزير:لا يا فندم معاليه قال كده..
المتصل: ضد مين إن شاء الله؟!!!
مدير مكتب الوزير: ضد وزير الداخلية...
المتصل يغلق السكة..
مدير مكتب الوزير: الواجب يقول إنك تكون جنب معالى الوزير.. المشكلة هو راح يتظاهر فين؟!