فجأة أصبحت الشريعة هي نجمة الفضائيات في نشرات الأخبار والبرامج.. ورغم أنها عقدت مؤتمراً صحفياً موسعا قالت فيه بوضوح إنها بريئة تمام مما يقال عنها، أو حولها، أو من ينطق باسمها.. ويحتكرها لنفسه.. لكن البعض لم يقتنع بهذا الكلام وأراد حديثا منفردا معها وحاولوا قدر اجتهادهم.. إلا مذيعة واحدة أفلحت بالفعل في الوصول إلي الشريعة وانفردت معها بهذا الحوار النادر: الشريعة: انت وصلت هنا ازاي؟ المذيعة: اللي يسأل .. يوصل الشريعة: لكن انا قلت كل اللي عندي في المؤتمر الصحفي المذيعة: أنا مش عايزة كلام اذيعه.. أنا عايزة كلام يريحني! الشريعة: للدرجة دي تعبانة!! المذيعة: وناس كتيرة حالتهم تعبانة اكثر مني! الشريعة: عارفة إيه السر في كده؟ المذيعة: اموت وأعرف!! الشريعة: المفروض إنها شريعة واحدة وباينه مفيش غيرها.. لكن اللي حاصل دلوقت عندنا 90 مليون شريعة.. والنتيجة الطبيعية كله يتكلم عن الشريعة.. وباسمها وهي نفسها غايبة. المذيعة: طيب نعمل ايه الله يخليكي! الشريعة: المسألة بسيطة خالص.. المذيعة: ازاي بس؟ الشريعة: كل واحد يسأل نفسه قبل ما يسأل غيره أنا فين والشريعة فين؟ المذيعة: كلهم للأسف بيقولوا انهم قرايبك واحبابك وحراسك ونن عينك الشريعة: ما حدش اخد تفويض رسمي مني بكده؟.. انا جيت بالرحمة والعدل والنور والحق والسحاحه المذيعة: للأسف الجماعة اللي بيتكلموا باسمك مش فاهمين كده! الشريعة: وجايز فاهمين وبيستعبطوا! المذيعة: لو قلنا لهم كده.. ممكن يكفرونا ويطلعونا من الملة الشريعة: ربنا سبحانه وتعالي اعلم بالنوايا والقلوب وهو الغفور الرحيم السميع العليم المذيعة: بس هو ده الكلام اللي الناس محتاجة تسمعه صوت وصورة من فضلك الشريعة: ولو قالوا اشمعنا انت اللي قدرتي توصلي للشريعة ومش بعيد كمان حد يقول ان انا شريعة غير شرعية! المذيعة: لو مشينا وراء الكلام مش هنخلص! الشريعة: ما هو الكلام سبب المصايب كلها في الفضائيات والجرايد وعلي النت!! المذيعة: يعني إيه؟ الشريعة : يعني باختصار «الدين المعاملة» واضحة كده ولا اقول كمان! المذيعة: انا مكسوفة من نفسي قوي.
