لما تبقى كل البنات شمال

مين قال إن كل البنات شمال، ولا كل الرجالة خاينين، ولا الدنيا هي اللي بتخرب حياتنا، ليه مش بنقول إننا اللي بنفكر غلط وبنختار غلط..
الدنيا فيها وفيها، زي ما فيها رجالة كلاب فيها ستات خاينة، وزي ما فيها بنات ناس محترمة فيها رجالة تتاقل بالدهب، الفكرة في الاختيار السليم، مش في المظاهر ولا في الحاجات الحلوة اللي بنشوفها في الإنسان اللي بنتعامل معاه، الحكاية بسيطة، اختار صح، ساعتها هتشوف الناس على طبيعتها وهتعاملهم المعاملة اللي يستاهلوها وساعتها مش هتقول إن فيه حد شمال، لأنك هتشوف كل حد على حقيقته..
اوعى تندم على واحدة حبيتها من قلبك يوم حتى لو طلعت شمال بجد، قول الحمد لله أنك شوفتها، بس اسمع نصيحتي اوعى يوم تحب حد فيه طباع ماتناسبكش على أمل أنك تغيره، لأنه عمره ما هيتغير، ساعتها بس هتحس أنك ندمان..
مش كل الناس وحشة ولا كلهم ملايكة وإلا ماتبقاش أنت من الناس، بس ماتجهدش قلبك مع حد مايستهلوش، يعني هنرجع لنفس النقطة، الاختيار الصح..