كان حلم كبير يا ليالي أتقل من جبل الصبر عشناها سنين ما بتخلص والعقل يقول مش جاية والضلمة السودة جبال والصبر ف بقي ممرر والجفن يداري العين والبصة الحزن ماليها واللقمة طعمها علقم والشط التاني غيامة أفرول ملبوس بقيامة وأجازة ملهاش طعم والرمل يسد العين ولا شايف أيه بيداري بيقولوا قال بارليف وجيوش ما بتعرف قهر يا معوض رايح فين نفسك تسبح للضفة وتدمر جبل الخوف أجلت يا روحي الزفة وأمك على طول شكاية أملها تشوف لك عيل والرد يا أمي لا يمكن والرأس غطاها الطين يا أفرح وأنا راسي لفوق يا بلاها فيلم جواز لفيت ع الوسط علمنا وكتبت عليه بحروف وبروجي بصوته يلعلع يضرب نوبة صحيان يترص طابور وصفوف والشمس تركز نورها وتدوب من نارها سحابة إصرار ف القلب مصمم يا حبيبتي طالعلك شمس وأخيرا وصل الأمر في الودن بيهمس همس وفي صدري قلبي اتنطط الفرح خلاص يا قنال اليوم ده ولا ع البال اليوم ده اسمه عبور عدى وأعملك همة هيا دي أي مهمة أول خطوة للقمة بأيديك اتعلق نصر من عين الآلي ف أيدك هيطل علينا الفجر والقافية ف أيدي تزهزه وتلين للساني حروف والندر لربي ندرته هدبح عجلين وخروف وكتيبتي هتحضر فرحي والرقص ع المكشوف طيران والضرب بقوة ورصاص طلقات وبارود وقوارب فوق المياه وجسور دشنها جنود والأرض للحظة ووقفت تنهار خرافات وسدود والشمس تعلي شعاعها المصري مالهش حدود أرواح شهدائنا تزغرط المصري فاق يا جدود والنصر راياته ترفرف والأرض تملي تجود وملايكة ربي هتشهد المصري مالهش حدود