أعياد طفولة

شعر - علاء عبدالسميع
بلونة من قلب السما.. طالعة بخيوط أحلام

عصفورة طايرة.. بترتعش

مش برد..

ده الخوف الزؤام

بنتي يا بنوتة المدارس

ليه شايفة قلبي بيتنفض..؟

حدوتي باشت في السكون

ونني عينك لم يحرر بصتي

نني عينك لم ينام

( مدرستي يا مدرستي )

شارعك مفروش بأغصان الدموع

رغم الموانع

واشتياقي احضنك لما انصهاري

كان لسه ساكن جوه قلبك

صوت نشيدي

محفور في قلبك أمنياتي

مصطبة للصبح

يرتاح علي عيوني دفاكي ....

بتئن الشاشات م المهرجان

العيال فوق الرصيف.. واقفة بتحلم

مين هيمسك مية العربية.

لما ترش في العيد الكبير

مين هيعمل جزمة من طين الطريق

مين هيكسي الطين خدوده

العيال فوق الرصيف..

مطرح ما بيناموا.. يقوموا..

يحلموا........

عيد الطفولة مش بييجي للغلابة /

دق الجرس..

( مدرستي يا مدرستي )

ضمي رمشك وامنحي قلبي النشيد

راح استهجي..والعلم رفرف عليك

رغم انه قادر يحتويكي..

بيبص لي...

وانا في الميدان / باعلمه

ازاي يرفرف فوق دموع الأمهات

ينزف وريك لون اسطبل الشمس.....

آهات.. .. .....

ايدك علي قلبك ياللي بتعلم ضناك الويل..

ميت ألف رغبة بتربط النوم المخاصم نني عينك
بالتحافك لهفة الوضع المميت

ما بين سنا كوابيسك وعري ولادك المنحاش نداهم.....

تحت باط الطل . .......................
والموت /
وضحكة عيلة..
ولا تعرف من طعم الموت..
غير لون هموم الجده...... حزن الأغنية..
علي جبينك أنا باهرب
علي نورك انا ماشي.. وبتونسني تهجيتك حروف اسمك
طب ليه كتابك لما ضمك - له - وحاول يطبعك جواه
..... بكيت
وازاي ضفيرتك لما هب الريح
وطارت في المدي..
زي الندي....
رجعت ترشك بالبخار
تطرف عنيكي...
وازي عرفتي رغم سنك..
... يا حبيبتي...
ازاي عرفتي انك ..... تموتي ..؟
لاجل ما يعيش النشيد..
داخل وريدك
طارحة ضحكاية وبنية حمام..؟
دق الجرس......
الدرس لسه مانتهاش...
والعيد...
...... ما جاش.