يا بخت من وفق "أكونتين" فى الحلال

لازم تدخل البيت من بابه، وتعمل "تاج" لبابا فى الإيفنت، هكذا ردت عليه حبيبته لإبداء رغبتها فى الزواج الالكترونى، "يا بخت من وفق أكونتين فى الحلال" صفحة تقوم بدور الخاطبة ولكن فى عصر الحب "أون لاين"، الصفحة رصدت أهم مواصفات بروفايل العروس المناسبة، فماذا قالت ..
فارس خطاب: وضع لها صورة دبلة فى البروفايل الخاص بها ع الفيس بوك.. وقال لها: تتجوزينى؟؟ فردت عليه: ههههه إيه اللى أنت بتقوله ده ..طيب اعمل" تاج" لبابا بقى أنا ماليش رأى فى الحاجات دى ..فعمل "تاج "ل(بابا) فرد عليه بابا: إحنا يا ابنى يشرفنا طبعا ..بس مش واجب تعمل "تاج" لأهلك بردو؟ مش دى الأصول واللا إيه..رد عليه العريس أنا آسف ياعمى فاتتنى دي..وعمل "تاج" لأبيه وأمه وعيلته كلها..واتجمعوا فى "ايفنت" واحد..وكتب أبوه الفاتحة وكلهم عملوا "لايك"..وكل واحد كتب "كومنت"بارك فيه للعرسان..هكذا تمت الخطوبة ..لولولولوليييى ..وعقبال عندكم جميعا فى بروفايلاتكم.
محمد الخضرى: مواصفات فتاة الأحلام من خلال بروفايلها .. أن يكون ليها أكونت واحد بس على الفيس بوك .. ماتكونش حاطة صورتها على الفيس بوك .. ماتكونش ضايفة شباب إلا أخوها ولو كترت قوى يبقى ابن خالتها .. إن الفريندز عندها مايعدوش ال430 .. يكون أدمن فى جروب أو اتنين بالكتير ويابخت من وفق أكونتين فى الحلال.