شباب الثورة ناقصين تربية !!

ثورتنا ضد فساد المخلوع "ثورة الشباب" بهرت كل دول العالم إلا "دولتنا إحنا".. خد مثلا "ديفيد كاميرون رئيس وزراء إنجلترا": يجب أن تدرس الثورة المصريه لطلابنا.. باراك أوباما: يجب أن نربى أبناءنا ليصبحوا كشباب مصر.. رئيس وزراء إيطاليا: لا جديد فى مصر فقد صنع المصريون التاريخ كالعادة.. ستولتنبرج رئيس وزراء النرويج: اليوم كلنا مصريون.. هاينز فيشر رئيس النمسا: شعب مصر أعظم شعوب الأرض ويستحق جائزة نوبل للسلام.. البرتغالى كريستيانو رونالدو نجم ريال مدريد: أتابع أخبار الثورة المصرية أكثر من أخبار برشلونة.. جريدة الجارديان "البريطانية": 30 ثانية لخطاب عمر سليمان وضعت نهاية حكم استمر 30 عاما.
تعالوا بقى نشوف تعليقات آبائنا وأمهاتنا (أولياء أمور شباب الثورة ) على ولادهم اللى بهروا العالم كله، عم مجدى البقال لابنه الثائر: يابنى اتلم بقى وامسك كتاب جتك نيله انت واللى معاك فى التحرير.. ولا نبوية المفترية جارتنا جريت ورا ابنها بشبشب زنوبة "ده برده من شباب الثورة ": إلهى يحرقك يا بعيد أهو بسببك انت والمقاطيع اصحابك مش عارفة اعمل لابوك حلة المحشى بسببكو!!!!

طبعا مافهمتش إيه علاقة الثورة بالمحشى لكن أعصابى تعبت لما سمعت الكلمتين دول من شباك أوضتى وطبعا صوتهم كان جايب لحد مدغشقر، المهم قلت أنزل اتمشى ولا اركب أتوبيس لحد التحرير وأنا فى الأتوبيس لقيت شاب لطيف وظريف عنده 80 سنة تقريبا قبل الميلاد، بيقول: الجيل ده جيل مش متربى وجيل التيك أواى متربوش على الطبلية لأن أبوهم بيرجع متأخر معندوش وقت يربى.
ما علينا، المهم "عشان أنا من الجيل اللى مش متربى ده " قلتله أنت غريب جدا بتلوم على الشباب وبتحملهم إنهم طلعوا لقوا أبوهم بيلف حوالين نفسه مش لاقى ياكل ومعندوش وقت يعمل حاجة غير إنه يشتغل وبس، وبعدين الشباب دى بتجيبلك حقك اللى انت ضيعته وانت مش فاضى، طب ما تروح تقول الكلام ده لمرسى عمال يكدب علينا من ساعة ما شوفناه مرة يقولك فى ناسا ومرة تانية لأ مش فيها مرة يفتح صدره فى التحرير وبعدها بشوية يمشى بحراسة وجيوش شوية يقولك 100 يوم وهظبط البلد وادينا داخلين على 240 يوم والدنيا خرابة يبقى مين فينا اللى مش متربى؟ الراجل مردش عليا خالص وحط وشه فى الشباك وسكتم بوكتم ......
ماعملتش المحشى، لو عرفت الحل اوعى تتصل بيا لانى من الشباب اللى ناقص تربية.