السيسي لوزير الأعمال: العيب مش فيك.. والقطاع مبيحلش مشاكل

قال الرئيس عبد الفتاح السيسي: "عندنا صرح كبير جدا من المصانع من فترة الخمسينات، بس بنضيع وقت كتير في إعادة تأهيلها".
وأضاف السيسي، خلال كلمته بمؤتمر صحفي بالمنوفية، اليوم الإثنين: "إذا كنتوا هتمشوا في مسارات إصلاح تقليدية مش هنخلص، لأن الدراسات بتاخد وقت طويل، على سبيل المثال، الأهالي في الصعيد عايزين ناخد منهم السكر بسعر كويس، وفي نفس الوقت المصانع اللي موجودة قديمة وتكلفة التشغيل هتبقى عبء على الشركة".
وذكر: "يعني عشان نطورها لازم العمال في المصنع يساعدوني والمصريين يبقوا فاهمين الدنيا وتساعد الحكومة، لازم نسأل نفسنا هل السكر المصري بينافس السكر العالمي، طبعا لا وكلنا عارفين".
وتابع: "إحنا بنفقد القيمة المضافة للصناعة دي، تقريبا 20% من القيمة الحقيقة للإنتاج بسبب المصانع القديمة، نفس الوضع في الغزل والنسيج والحديد والصلب"، موجها حديثه لخالد بدوي، وزير قطاع الأعمال العام: "محدش يزعل بس اللي بيجي بيغطس ومبيطلعش وقطاع الأعمال مبيحلش المشاكل، العيب مش في الوزير بس التحديات كبيرة، يعني عايز عشان أعمل مصانع السكر من تاني 1.8 مليار جنيه".