عمرو سعد للإعلام: أنا مش مغرور (فيديو)

حصل الفنان عمرو سعد على جائزة أفضل ممثل دور أول عن فيلم «مولانا»، خلال فعاليات حفل اختتام الدورة ال33 لمهرجان الإسكندرية السينمائي لدول حوض البحر المتوسط.
قال سعد، خلال تكريمه: «عمرى ما حسيت إني نجم أو ممثل، بحس دايما إني جمهور، بستمتع بالسينما كجمهور، واسمحوا ليا إني أهدي الجائزة دي لنفسي، وحابب أقول عن نفسي كلام حلو، مش عارف ليه».
وأضاف خلال كلمته: «قدمت 7 أفلام، وممكن أكون اعتذرت عن عشرات الأفلام عشان بفكر في اختياراتي كجمهور، علشان مش عايز أخون فكرة إني ممثل، واحترم الناس اللى أنا جاي من وسطهم، اللي كتير منهم مظلوم في التعبير عنه على الشاشة الفضية، أنا ركبت الأتوبيس ومشيت مسافات طويلة عشان أروح المدرسة، عشان كدا عارف معانتهم، أنا ما شوفتش الحاجات دية في السينما، عشان كدا بحلم أكون جزء من تحقيق حلم هؤلاء المواطنين في السينما حتى لو همتعهم وأسليهم».
وتابع: «محدش يزعل مني، أنا عاوز أقول حاجة من قلبي، فيه ناس مش عرفاني صح، مش فهماني، أنا بتكسف وبخجل كجمهور، وببعد عن الإعلام والأضواء كجمهور، محدش يفتكر أن ده ليه علاقة بالغرور».
وواصل سعد:«بشكركم وبشكر نفسي إن عملت فيلم مولانا، وبقولكم أننا لسه راجعين من أمريكا، كان فيه 25 من من أهم نقاد العالم بيتفرجوا على الفيلم، ومنهم 8 بكوا وتأثروا بالفيلم من أهميته ورسالته، وده شرف لينا، وأنا سعيد إني جزء من هذا العمل».