بعد هزيمة الأهلي.. نشطاء عن إكرامي: النني بيصد في الإعلان أحسن منه

كتبت: سارة علاء
تعرض شريف إكرامي حارس مرمى النادي الأهلي لهجوم شديد من مشجعي فريقه، بعد خسارة الأهلي أمام زيسكو الزامبي بثلاثة أهداف مقابل هدفين، أمس السبت، في إطار المباراة المقامة للدور الثمانية بدوري أبطال إفريقيا، فرأى البعض أن السبب الأساسي في الهزيمة هو "إكرامي"، ودافع البعض الآخر عن "إكرامي" مؤكدين أنه جزء من الفريق وليس الفريق بأكمله ولا يجب لومه على قصور في الفريق.
الفريق المهاجم
أحمد فتحي
نشرت أحمد فتحي، وهي صحفة غير رسمية للاعب الأهلي أنشأها محبو اللاعب، صورة لشريف إكرامي، وعلقوا عليها: "من سيئ لأسوأ".

إيهاب الزلاقي
هاجم الصحفي إيهاب الزلاقي "إكرامي" عبر حسابه الشخصية على موقع تويتر، قائلًا: "مش هنتقد حسام غالي ولا شريف إكرامى أصل نفسيتهم بتتعب".
هشام منصور
سخر الكاتب هشام منصور عبر حساب على "تويتر" منسوب له، قائلًا: " النني كان بيصد في الإعلان أحسن من شريف إكرامي".
محمد عبد الرحمن
سخر الكاتب محمد عبد الرحمن على حسابه على موقع "تويتر"، قائلًا: " شريف إكرامي اللي بتهاجموه ده بيحرس مرمى ناشئ الأهلي من سن 16 سنة، وعمره ما درس بيزنس في إسبانيا.. أنت بقى يا ناقد يا رياضي عملت إيه؟".
كما هاجم عدد من النشطاء "إكرامي" محملينه مسئولية الهزيمة
فعلق أحد النشطاء: " تقريبا شريف إكرامي مكنش موجود في الماتش".
وعلق آخر: " شريف إكرامي مستواه في انحدار! مفيش تطور لمستواه خالص.. ده لاعيبة زيسكو ماصدقوا عمالين يشوطو من كل حته".
بينما علق آخر: "عشان النادي يبدأ يتعدل من جديد، "إكرامي" لازم ميكونش معانا الموسم الجديد، ده لو عايزين النادي يرجع للفوز من جديد.. كفاية عك ومجاملة".
كما تداول نشطاء موقع فيسبوك، فيديو ساخر يظهر فيه مرمي الأهلي خاليًا وعدم وجود شريف إكرامي لحراسته.
الفريق المدافع
خالد الغندور
دافع الإعلامي خالد الغندور عن "إكرامي"، وكتب عبر حساب منسوب له على "فيسبوك"، قائلًا: "مع احترامي لكل من يحمل "إكرامي" مسؤولية الأهداف التي تدخل مرماه، ولكن الحقيقة أن الفريق بالكامل وخصوصًا الوسط المدافع والأطراف وقلب الدفاع، واسترجعوا كل الأهداف، إكرامي لا يتحمل إلا جزء وعلى الباقي أن يتحمل دخول الأهداف مرمى الأهلي".
كما دافع عدد من جمهور النادي الأهلي عن "إكرامي"
فعلق أحد النشطاء: "مش كل ماتش نغلط في إكرامي..إكرامي النهاردة حرمنا من إننا كنا هنخرج بفضيحة.. خط الدفاع زي الزفت و محتاج يتحل بسرعة.. إكرامي أه بيغلط.. لكن الماتش ده هو مش غلطان في حاجة.. ده شايل ٣ ولا ٤ أجوال مؤكدين.. اهدوا شوية على إكرامي علشان دلوقتي هو الحارس بتاعنا.. مش هنستفيد حاجة لما نقطم فيه كل ماتش.. بالعكس دة إحنا هنخسر وهيتوتر ويخش فيه أجوال أكتر من الأول".
وعلق آخر: " حتى لو هو فعلًا وحش، إحنا المفروض نديله الثقة الفترة دي، على الأقل لحد ما نجيب حارس، إنما كده أنتو اللي بتبوظو مستواه انتقادكو بالشكل ده في الوقت ده سلبي".
بينما علق آخر: "إنتوا خسارة تشجعوا الأهلي أصلًا، إكرامي شال كام جول كانوا هيدونا في داهية، إنتوا مش بتشوفوا غير الوحش بس الحلو متتكلموش عليه، إنتوا اللي هتخلوا سمعتنا وحشة وهتشمتوا فينا الزملكاويين.. من الآخر متستحقوش تشجعوا الأهلي".