أديب: «الناس بتتكلم عن ثورة تالتة.. والانفجار القادم هيضرب في وشنا كلنا»

قال الإعلامي عمرو أديب، اليوم الأحد، إن الشعب يحتاج إلى الشعور بالعدالة والاستقرار اللذين يفتقدهما، ما انعكس سلبًا على شخصيته وانفعالاته، مضيفًا: «محتاجين نستقر شوية، محتاجين نهدى، إحنا مش طايقين بعض فعلًا، وكل واحد بيكلم نفسه، غني أو فقير».
تابع أديب، خلال تقديمه برنامج «القاهرة اليوم»، عبر قناة «اليوم»، «الناس مش بتتكلم غير على ثورة جاية وبس، أي حد تكلمه يقولك الثورة الجاية، يا جماعة هو في إيه؟ هما الثورتين اللي فاتوا عملوا إيه؟ إحنا عندنا أزمات اقتصادية ومشاكل كبيرة، خلونا نمشي ونبص لقدام، كل واحد يقولي الثورة الجاية، جاية إيه تاني؟ إنتوا عايزين تعملوا فيها إيه تاني؟ بلاش تهزوها أكتر من كده وإلا والله ما هتنفع».
استكمل: «الناس لازم تشعر إن في عدالة، إن في أمل، إن في شباب بتتولى قيادة مناصب، فين مشروعات الشباب واحتوائهم، إحنا مشيلين العواجيز لحد دلوقتي كل حاجة، فين تمكين الشباب غير سجنهم؟ قولولي مركز في البلد ماسكه شاب واحد، هل شايفين محافظ أو وزير شاب؟ فين الشباب؟ إحنا محتاجين نفس جديد».
استطرد: «أنا مش من أنصار أن الانفجار القادم هيكون ثورة وبتاع، الانفجار القادم هيضرب في وشنا كلنا، إحنا والله على الحافة، رغم إني شايف والله إن فينا أمل، عندنا إمكانيات وثروات وقدرات، لكن فين الإحساس بأننا بنعيش في مجتمع عادل؟».