أحمد موسى ل«أبو الفتوح»: «أنزل الانتخابات الجاية والشعب هيقولك إنت مين»

اتهم الإعلامي أحمد موسى، اليوم الثلاثاء، الدكتور عبد المنعم أبو الفتوح، رئيس حزب مصر القوية، بقيادة حملة للتشكيك في مفاعل الضبعة النووي، بمساعدة عدد من وصفهم ب«الأراجوزات» الملتفين حوله.
أضاف موسى، خلال برنامجه «على مسئوليتي»، عبر فضائية «صدى البلد»، «أبوالفتوح اللي أنا معرفش بيشتغل إيه بيتحدث عن أن المفاعل سيتسبب في مشاكل وأزمات لاحقة؛ بسبب الإشعاع النووي وكلام من ده، بدأ يفتي في النووي وكأنه دارسه كويس، وأنا أؤكد أن مفاعل الضبعة النووي سيحمل مستوى أمان غير متوفر في أي مفاعل آخر في العالم، والرئيس عبد الفتاح السيسي كان حريصًا على هذه النقطة للغاية».
تابع: «الأخ أبو الفتوح مش عايز يبقى في بلد، بيشكك في أي شيء بيتعمل كويس، الشركة الروسية واحدة من أكبر الشركات في العالم في مجالها، عامله 96 مفاعل نووي حول العالم»، مخاطبًا أبو الفتوح: «من فضلك أبعد عننا شوية، وأبعد الأراجوزات بتوعك، اللي عنده كلمة حلوة يقولها واللي معندوش يبطل فتي، أبعدوا عن الشعب، إحنا عارفين دولتنا كويس، ولو عايز تراهن أنزل الانتخابات الجاية والشعب هيقولك إنت مين».