محمد دياب: مشاركتي بفيلم «اشتباك» في مهرجان «كان» حسسني إني شبه محمد صلاح

كتب: مصطفى جلال
عبر المخرج محمد دياب، أمس السبت، عبر حسابه بموقع التواصل الإجتماعي "فيسبوك"، عن حزنه لعدم الحصول على جائزة عن فيلمه "اشتباك" من مهرجان كان، وذلك لأنه كان يرغب في إسعاد الشعب المصري.
وكتب دياب قائلا "جوايز مهرجان كان أعلنت والسبب الوحيد اللي مخليني زعلان إن فيلم اشتباك مخدش جايزة أنا كان نفسي الناس تلاقي حاجة تفرحها وسط الغم وإن كل شاب محبط يحس إنه يقدر يوصل لأي حلم حلمه.. الأيام اللي فاتت حسيت إني محمد صلاح لعيب الكورة اللي بقى مصدر السعاده الوحيد وهو بينجح وبيرفع راس مصر بين أهم أنديه العالم.. مع كل خبر عن الاستقبال الإيجابي للفيلم أو عن اختيار النقاد ليه من أهم ١٠ أفلام في المهرجان، أو اختياره من الخمس أفلام المدعومة من رابطه السينمات المستقلة في فرنسا كنت بشوف الناس بتفرح كأنه جون لمصر في كأس العالم".
وأضاف قائلا "الحاجة الحلوة ان اللخبطه اللي عايشنها في مصر بتتحول لمصدر الهام فني لجيل جديد. معنديش شك إن كل مهرجانات العالم وأي تظاهرة فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم.. كنت هتضايق لو كنت حاسس إن وجودنا هنا صدفة ومش هيتكرر، بس ده اجتهاد وتعب وعرق وتفكير وأكيد مكلل بتوفيق ربنا.. عشان كده متأكد إن لينا جولات تانية كتير .. يمكن تكون رحلة مهرجان كان انتهت، بس رحلة اشتباك لسه بادئة في كل مهرجانات العالم ولو الدعم اللي شايفه منكوا اتوجه لقاعات السينما في مصر، ساعتها هنشوف أفلام زي اشتباك وأحلى من فنانين كتير محتاجين دعمكم".
وأكمل محمد دياب حديثه قائلا "نفسي أشكر كل إنسان باركلنا أو دعمنا أو دافع عن الفيلم (خاصه الزملاء الفنانين) و بعتذر اني معرفتش أرد علي كل واحد وأشكره بنفسي شكرا ليوسف شاهين ويسري نصرالله و صناع ال٢٣ فيلم مصري اللي شاركوا قبل كده عشان انتو اللي فتحتولنا الباب هنا، وشكرا لكل الفنانين المصريين اللي مستوى شغلهم تطور في السنين اللي فاتت واللي كانوا مصدر إلهام شخصي".