أول تعليق ل"محمد دياب" بعد خروج فيلم "اشتباك" بدون جوائز من "كان" السينمائي

قال المخرج المصري محمد دياب الذى افتتح فيلمه "اشتباك" مسابقة "نظرة ما" فى الدورة ال69 من مهرجان كان السينمائي الدولي، وخرج منذ قليل، بدون جوائز، " كان نفسي الناس تلاقي حاجه تفرحها وسط الغم".

وأضاف علي حسابه الشخصي على موقع التواصل الاجتماعي "فيسبوك":"" جوائز مهرجان كان أعلنت و السبب الوحيد اللي مخليني زعلان أن فيلم اشتباك مخدش جايزه أن كان نفسي الناس تلاقي حاجه تفرحها وسط الغم و ان كل شاب محبط يحس انه يقدر يوصل لأي حلم حلمه. الأيام اللي فاتت حسيت أني محمد صلاح لعيب الكوره اللي بقي مصدر السعادة الوحيد و هو بينجح و بيرفع رأس مصر بين أهم أنديه العالم، مع كل خبر عن الاستقبال الايجابي للفيلم او عن اختيار النقاد ليه من اهم 10 افلام في المهرجان، او اختياره من الخمس أفلام المدعومة من رابطه السينمات المستقلة في فرنسا كنت بشوف الناس بتفرح كأنه جون لمصر في كاس العالم.

وتابع:" الحاجة الحلوة أن اللخبطة اللي عايشنها في مصر بتتحول لمصدر الهام فني لجيل جديد. معنديش شك ان كل مهرجانات العالم و اي تظاهره فنيه هنشوف فيها فنانين مصريين هيخترعوا طرق متخيلنهاش عشان يعبروا عن نفسهم كنت هتضايق لو كنت حاسس ان وجودنا هنا صدفه و مش هيتكرر، بس ده اجتهاد و تعب و عرق و تفكير و اكيد مكلل بتوفيق ربنا .. عشان كده متأكد ان لينا جولات تانيه كتير smile emoticon ".

وأردف:"يمكن تكون رحله مهرجان كان انتهت، بس رحله اشتباك لسه بادئه في كل مهرجانات العالم و لو الدعم اللي شايفه منكوا اتوجه لقاعات السينما في مصر، ساعتها هنشوف افلام زي اشتباك و احلي من فنانين كتير محتاجين دعمكوا، نفسي اشكر كل إنسان باركلنا او دعمنا او دافع عن الفيلم (خاصه الزملاء الفنانين) و بعتذر اني معرفتش ارد علي كل واحد و اشكره بنفسي".

وتابع:"شكرا ليوسف شاهين و يسري نصرالله و صناع ال23 فيلم مصري اللي شاركوا قبل كده عشان انتو اللي فتحتولنا الباب هنا، و شكرا لكل الفنانين المصريين اللي مستوي شغلهم تطور في السنين اللي فاتت و اللي كانوا مصدر الهام شخصي، وأهم شكر للي آمنوا بالفيلم وقت ما ناس قالت مستحيل يتعمل و كل شخص اشتغل في الفيلم و عمل إضعاف المجهود واللي هيشوف الفيلم ده هيعرف قد ايه اللي اشتركوا فيه بيحبوا بلدهم".

وأضاف:" أما كل واحد حس أن الفيلم بيمثله و كان بيتمنالنا و لمصر الخير و بعتلنا دعوه او شويه طاقه ايجابيه الف الف شكر وزي ما قولت قبل كده احنا كسبنا اهم جايزه و هي احترام العالم مبروك لينا و لمصر ‫#اشتباك".

"اشتباك" من بطولة نيللى كريم وهانى عادل وطارق عبد العزيز وأحمد مالك، ومن سيناريو وحوار خالد دياب ومحمد دياب، ويقوم بإخراجه محمد دياب فى ثانى تجاربه الإخراجية بعد فيلمه "678"، الذى تناول فيه قضية التحرش الجنسى بجميع أشكاله فى تجربة جريئة.