مخرج "اشتباك": "كان نفسي نفوز بجايزة في كان عشان نفرح الناس"

قال المخرج محمد دياب، مخرج فيلم "اشتباك"، إن السبب الوحيد لحزنه عقب عدم فوز الفيلم بأي جائزة في مهرجان "كان" السينمائي الدولي، هو أنه كان يتمنى أن يدخل الفرحة على قلوب المصريين، لاسيما في ظل الحزن الذي يعيشوه حاليًا.

وذكر "دياب" عبر حسابه بموقع "فيس بوك": "كان نفسي الناس تلاقي حاجة تفرحها وسط الغم، وإن كل شاب محبط يحس أنه يقدر يوصل لأي حلم حلمه".

وأضاف: "الأيام اللي فاتت حسيت إني محمد صلاح لعيب الكورة اللي بقي مصدر السعادة الوحيد وهو بينجح وبيرفع راس مصر بين أهم أنديه العالم".

وتابع: "مع كل خبر عن الاستقبال الإيجابي للفيلم أو عن اختيار النقاد ليه من أهم 10 أفلام في المهرجان، أو اختياره من الخمس أفلام المدعومة من رابطة السينمات المستقلة في فرنسا، كنت بشوف الناس بتفرح كأنه جون لمصر في كأس العالم".

وأشار دياب إلى أن "الحاجة الحلوة أن اللخبطة اللي عايشنها في مصر بتتحول لمصدر إلهام فني لجيل جديد.. معنديش شك إن كل مهرجانات العالم وأي تظاهرة فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم.. كنت هتضايق لو كنت حاسس إن وجودنا هنا صدفة ومش هيتكرر، بس ده اجتهاد وتعب وعرق وتفكير وأكيد مكلل بتوفيق ربنا.. عشان كده متأكد إن لينا جولات تانية كتير".

كما قال: "يمكن تكون رحلة مهرجان كان انتهت، بس رحلة اشتباك لسه بادئة في كل مهرجانات العالم ولو الدعم اللي شايفه منكوا اتوجه لقاعات السينما في مصر، ساعتها هنشوف أفلام زي اشتباك وأحلي من فنانين كتير محتاجين دعمكوا".

واختتم رسالته: "شكرا ليوسف شاهين ويسري نصرالله وصناع ال23 فيلم مصري اللي شاركوا قبل كده عشان إنتوا اللي فتحتولنا الباب هنا، وشكرا لكل الفنانين المصريين اللي مستوى شغلهم تطور في السنين اللي فاتت واللي كانوا مصدر إلهام شخصي".